Hlá mơ-éa pơtroh dêi Chin phuh pơtroh ăm Vi ƀan pơkuâ Kuô̆k hô̆i ngăn 2 tơdroăng ki kal: Xoăng túa pơkâ ‘no liăn pêi cheăng tơdjuôm ki krâ kơvâ khế hơnăm pơla hơnăm 2021-2025 cho 22.551 rơtal liăn kơxô̆ liăn ‘măn kơdĭng tơdjuôm ăm Túa pơkâ ‘no liăn pêi cheăng tơdjuôm ki krâ kơvâ khế hơnăm ing kơxô̆ liăn thăm mơdêk nâp liăn Tơnêi têa hơnăm 2022 ăm 11 tơdroăng tơkêa; xoăng túa ‘no liăn pêi cheăng tơdjuôm hơnăm 2024 cho lối 2.100 rơtal liăn ing kơxô̆ liăn thăm mơdêk nâp liăn Tơnêi têa hơnăm 2022.

Pôa Trần Thanh Mẫn, Kăn xiâm hnê ngăn Kuô̆k hô̆i tối tiah kố, troh nôkố, xuân ối ai hên tơdroăng tơkêa, kế tơmeăm hrá pro, thăm nếo tá hâi châ xoăng liăn.  Xua mê, Kăn xiâm hnê ngăn Kuô̆k hô̆i pơkâ thế, Chin phuh hnê mơhno mâu khu xiâm, kơvâ cheăng rĕng séa ngăn, pêi pro nhên xiâm kối, séa ngăn kơtăng tung pơla pêi pro, pêi klêi mâu hlá mơ-éa ‘no liăn pêi cheăng xoăng liăn.

Kăn xiâm hnê ngăn Kuô̆k hô̆i xuân pơchân, hnoăng cheăng pơkuâ ngăn, xúa kơxô̆ liăn ‘no liăn pêi cheăng tơdjuôm kal kơdĭng, tơƀrê, pôi tá ăm ai tơdroăng ki tro kâ kơluâ, mơ’nhiê tê kơtê, tơdroăng tơkêa ki lâi pro mơhrê, pro tơdroăng loi tung Đảng, tung kuăn pơlê; pakĭng mê kal athế séa ngăn krá mâu tơdroăng tơkêa, kế tơmeăm xua Kuô̆k hô̆i kĭ.