Pôa Manuel Marrero Cruz, Ngế pro xiâm hnê ngăn kong têa tối hâk tơngăm châ tơdah pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa; tối rơdêi rôh lăm pôu kố dêi Kăn xiâm pơkuâ hnê ngăn Đảng, Kăn xiâm hnê ngăn tơnêi têa cho tơdroăng cheăng ki ai pơxúa sap nah tá chói ai tung tơrŭm cheăng pơla péa tơnêi têa.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối mơnê ƀă mơnhên tối khât mâu tơdroăng ki hiăng pêi pro klêi ki kuăn pơlê Cuba nhŏng o hiăng pêi châ tơƀrê tung troăng tâk troh chuh nghiah xah hô̆i tung pơla ối hên tơdroăng pá puât. Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa prếi pôa Manuel Marrero Cruz, Ngế pro xiâm hnê ngăn kong têa Cuba hiăng tơpui tơno ‘na tơdroăng tơrŭm cheăng pơla péa tơnêi têa tung pơla hdrối nah. Péa pâ hiăng tơpui tơno mâu troăng hơlâ vâ mơdêk tơƀrê tơrŭm cheăng Việt Nam – Cuba tung mâu kơvâ cheăng; môi tuăn mơdêk rơdêi ƀă mơdêk tơƀrê tơrŭm cheăng kâ, tối nhên péa pâ kal pơtối tơmâng ngăn, pêi pro tro mâu tơdroăng tơkêa tơrŭm pêi chiâk deăng, hriăn ngăn troăng tơrŭm cheăng nếo tơƀrê, krá ton.