Kơxê hâi lơ 26/9, tiô chôu kong têa Cuba, Leh tơdah păng ‘nâng pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa ƀă kơdrâi pôa rơtế ƀă khu râ kăn teăng mâ râ xiâm Việt Nam râ Tơnêi têa troh tơnêi têa Kŏng hoà Cuba hiăng tơkŭm po kân krip a Hngêi pêi cheăng Kăch măng a pơlê kong xiâm La Habana.

Klêi kơ’nâi leh tơdah păng ‘nâng, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa rơtế Kăn pơkuâ hnê ngăn cheăng Đảng má môi, pôa Miguel Díaz-Canel Bermúdez, Kăn xiâm hnê ngăn kong têa Cuba pơkuâ khu râ kăn xiâm péa tơnêi têa tơkŭm po tơpui tơno.

Péa kăn xiâm pơkuâ hnê ngăn tơnêi têa tối nhên tơdroăng ki tơdâng pơla Việt Nam ƀă Cuba ‘na tơdroăng mơnhông mơdêk ƀă ‘na hiêm mơno, ‘na troăng prôk to chuh ngiah pơlê pơla ƀă tơrŭm krá tơniăn hiăng châ Pôa Hồ Chí Minh, Kăn xiâm hnê ngăn tơnêi têa ƀă pôa Fidel Castro, Kăn xiâm pơkuâ lêng mơjiâng, pơtâp mâu khế hơnăm. Péa kăn xiâm pơkuâ khŏm mơ-eăm pơtối mơnhông ó rơdêi tơrŭm cheăng môi tuăn tiô khôi vâi krâ nah, ki rơhêng vâ tối cho nhŏng o, tơrŭm cheăng tâi tâng Việt Nam – Cuba to a râ a’ngêi tâ tâi tâng, păng ‘nâng, châ tơƀrê ƀă krá tơniăn tâ.

Péa ngế kăn xiâm pơkuâ môi tuăn tơrŭm tơkŭm po lĕm tro Hôp tơpui tơno Lĭ luâ̆n roh má VI pơla péa Đảng ƀă Hôp tơpui tơno khoa hok lâp plâi tơnêi roh má II ‘na troăng tơmiât la ngiâ kăch măng dêi Pôa Hồ Chí Minh, Kăn xiâm hnê ngăn tơnêi têa hneăng apoăng ƀă pôa Fidel Castro, Khu râ kăn pơkuâ Kăch măng Cuba ƀă mâu tơdroăng tơrŭm ki ê tung la ngiâ.

A roh hôp tơpui tơno, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tơbleăng ƀă pôa Miguel Díaz Canel Bermúdez, Kăn xiâm pơkuâ hnê ngăn Đảng má môi, Kăn hnê ngăn kong têa Cuba ‘na Đảng, Tơnêi têa ƀă kuăn pơlê Việt Nam diâp kuăn pơlê Cuba nhŏng o 10 rơpâu tâ̆n phái; Khu xiâm ngăn ‘na tơrŭm pêi cheăng Việt Nam diâp Tíu xiâm mâu ngế pêi cheăng Cuba ƀă mâu kong pơlê Việt Nam xuân diâp kuăn pơlê Cuba mâu kơxuô tơmeăm.

Kơxê hâi lơ 26/9 chôu kong têa Cuba, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng trâm mâ tơpui tơno ƀă pôa Esteban Lazo Hérnandez, Kăn xiâm hnê ngăn Kuô̆k hô̆i Khu râ kăn pơkuâ Kuăn pơlê Cuba.