250 ngế kăn teăng mâ teăng lối 378 rơpâu ngế hdroâng kuăn ngo tung kong pơlê troh veăng, tung mê ai hên ngế ki má môi rơkê tung tơdroăng pơxiâm tăng cheăng pêi, mơnhông cheăng kâ, mơ-eăm pro kro mơdrŏng. Hneăng hôp pơkâ tơdroăng mơ-eăm troh hơnăm 2030, pêi lo liăn tơdâng kơpong hdroâng kuăn ngo châ sap ing 84 troh 87 rơtuh liăn/môi ngế/hơnăm; ƀă kơxô̆ rơpŏng kơtiê kơdroh sap ing 2-3%/hơnăm...

Troh lâp lu ó rơdêi mâu tơdroăng pơxiâm tăng cheăng pêi, tơ’noăng pêt mơjiâng tơmeăm khoăng; tơmâng mơ’no liăn tŭm tơdroăng vâ mơnhông cheăng kâ rơpŏng, khu tê mơdró, Khu tơrŭm cheăng a mâu pơlê tung kong pơlê. Hneăng hôp mơnhên, tơdroăng rêh ối dêi kuăn pơlê mâu hdroâng kuăn ngo kong pơlê Lâm Đồng hiăng châ mơdêk tâi tâng.

Tơdroăng tơmâng ƀă xúa teăm tơdrêng ki rơkê Khoa hok kih thuât tung pêt mơjiâng tơmeăm hiăng kum pêi lo liăn tơdâng 50 rơtuh liăn/môi ngế/hơnăm, tâk 12,5% tâng pơchông ƀă hơnăm 2019; Ki rơhêng vâ tối, nôkố lâp kong pơlê ai 353 khu tê mơdró xua mơngế hdroâng kuăn ngo pơkuâ, ƀă tâi tâng kơxô̆ liăn pơkâ tâk troh 2.773 rơtal liăn.

Xông tơpui a hneăng hôp, pôa Y Vinh Tơr, Kăn phŏ pơkuâ Vi ƀan Hdroâng kuăn ngo mơnhên, tơdroăng mơnhông cheăng kâ - rêh ối pơlê pơla kơpong kuăn pơlê hdroâng kuăn ngo dêi kong pơlê Lâm Đồng châ tơƀrê tâi tâng. Vâ pơtối mơnhông mâu tơdroăng châ tơƀrê, pôa Y Vinh Tơr tối ăm ‘nâi, Lâm Đồng kal pơtối tơmâng hên mâu kơxô̆ liăn kum ăm kơpong kuăn pơlê hdroâng kuăn ngo, mơdêk mâu tơdroăng pơkâ xiâm tơnêi têa ‘na mơjiâng thôn pơlê nếo ƀă kơdroh kơtiê krá tơniăn.