Troăng kân 721 dêi kong pơlê hiăng ăm rơxế kơtâu klêi Vi ƀan tơring Dà Teh tơrŭm ƀă Khu xiâm ngăn troăng prôk rơxế kơtâu kong pơlê Lâm Đồng ‘măn klŏng cho mơ’no têa a tíu tơhnâp ƀă ‘mâi rơnêu pro môi iâ nếo troăng vâ ví. Troh kơxê hâi lơ 26/9, pơla troăng ki pơtân mê hiăng châ mơjiâng pro klêi ƀă ok mâu tơnêi, hmốu ku kŭn, tơniăn ăm mâu rơxế vâ kơtâu.
Troăng kân 721 dêi kong pơlê cho troăng ki xiâm tơdjêp ƀă 3 tơring peăng hdroh dêi kong pơlê Lâm Đồng mê cho Dà Huoai, Dà Teh ƀă Cát Tiên. Hdrối mê, tung tơring Dà Teh ƀă Cát Tiên ai kong mêi kân ton hâi, pro têa rơlêa ing peăng kơnhŏng troh a mâu têa kroăng têa krông ki tơkâ luâ Troăng kân 721 dêi kong pơlê, pro tơhnâp klŏng ki tâp tung ‘nâi mơgăn troăng, tơhnâp troh tơdế troăng, pro mâu rơxế ôh tá chiâng vâ prôk tơkâ luâ.
Viết bình luận