Klêi kơ’nâi tơpui tơno, kăn pơkuâ Khu tơrŭm ‘na tơdroăng ki dêi khu pêi cheăng tơrŭm 2 to kong pơlê Hậu Giang ƀă Dak Lak môi tuăn ƀă tơdroăng ki xiâm hiăng kĭ tơkêa tơrŭm cheăng cho mơdêk rơdêi tối tơbleăng, tối ăm dêi rơpó mâu tơdroăng ‘na cheăng kâ rêh ối khu pú hên, khu pêi cheăng tơrŭm pơla 2 to kong pơlê, xuân môi tiah tơdroăng cheăng ki pêt mơjiâng pro, tê mơdró khu pêi cheăng tơrŭm, tối ‘na tơdroăng dêi kơchơ tê mơdró, túa ki tro ‘ló, túa pêi nếo, mơjiâng kế tơmeăm OCOP, pơlê pêi cheăng khôi hmâ, mơđah tơbleăng, tơbleăng tối mâu kế tơmeăm ƀă mâu kơvâ cheăng ki ê tơtro ƀă tơdroăng cheăng tung la ngiâ mơnhông, ivá pêi pro tiô púi vâ dêi rêm pâ.

Malối, Khu tơrŭm ngăn khu pêi cheăng tơrŭm 2 to kong pơlê kô cho tíu tơdjêp tê kế tơmeăm drêng mâu khu pêi cheăng tơrŭm ai tơdroăng ki vâ veăng tơrŭm, mơđah tơbleăng tơmeăm, kĭ pơtroh, tê mơdró tơmeăm pơla péa pâ pơla mâu khu pêi cheăng tơrŭm ‘na tê a kong pơlê. Pakĭng mê, pro tơ’lêi hlâu gum khu pêi cheăng tơrŭm 2 to kong pơlê ai rôh hrâim tâp ki rơkê, tối ăm dêi rơpó mâu tơdroăng ki rơkê plĕng, châ trâm mâ, mơđah tơbleăng, tơdjêp tê tơmeăm; tơdrêng amê hlối tối ‘na tơdroăng ki mơđah tơbleăng tê tơmeăm a mâu rôh po kơchơ, pơkâ mơdêk ‘no liăn cheăng, tê mơdró, rôh hôp tơpui tơno troh mâu khu pêi cheăng tơrŭm ai tơdroăng ki vâ veăng tơrŭm.