Pơla rơnó ki lâi ôh pá ai nhâ a tơbăng, rơpŏng hngêi pôa hrê dêi nhâ ki rơpŏng hngêi pêt tơ’nôm ƀă nhâ rôe ki vâi vâ ăm dêi ro rêi kâ tơ’nôm. Pôa Y Thêm ăm ‘nâi, sap ing pro kơdroăng păn, ro ki păn hlê, ‘nâi ‘no dêi mơdrêh tro a kĭng, tíu ối krúa lĕm iâ pro ‘mêi hyôh kong prâi.

“Kơpôu ro djâ păn a kố hlo hngêi ối krúa lĕm ôh tá xú ŭm. Hdrối nah tơmối troh lăm ôu kâ pơkoăng lơ lăm pôu hlo to eâk kơpôu, ro, ngăn ôh tá ‘nhó krúa lĕm.  Nôkố troh a kố hiăng lĕm ôh tá xú ŭm môi tiah nah’’.

Pôa Phạm Doãn Thắng, Kăn ƀô̆ pơlât mơnăn cheăm Ea Kpam, tơring Čư̆ Mgar, kong pơlê Dak Lak ăm ‘nâi, hdrối nah a  cheăm kố ki hên kuăn pơlê hmâ păn kơpôu ro chu tiô tơdroăng kơ’nêi hmâng vâ, troh kơxêi toi kât pá kơdâm hngêi trá. Păn tiah mê pro ‘mêi hlối xu ŭm, ngăn ôh tá krúa lĕm, hlối pro ‘mêi troh ivá. Pakĭng mê, rêm rôh ai pơreăng tâ tú a kơpôu ro xuân pá vâ mơdât. Xua mê, mâu kăn cheăm tơring, mâu kơvâ cheăng hiăng hnê tối thế kuăn pơlê pro kơdroăng kroăng, tơniăn tung tơdroăng păn.

“Khu grup hnê tối ƀă mâu kăn cheăm hiăng kơjo kum mâu tơdroăng mơjiâng pro kơdroăng khroăng. To lâi hơnăm kố 1 khu droh rơtăm kơjo kum pro kơdroăng păn. Nôkố mâu kơpôu ro ki păn  kơ’nêi pá kong ôi iâ, nôkố bu păn kơ’nêi tung kơdrum tê. Vâi tăng ăm kế kâ tăng ‘măn lôi vâ ăm ro kâ a rơnó mêi’’.

Tiô pôa Nguyễn Quang Đức, Ngế pơkuâ Tíu păn ƀă pơlât mơnăn tơring Čư̆ Mgar, kong pơlê Dak Lak, lâp tung tơring nôkố ai lối 14.000 to ro. Tung mê, bú ai môi kơdroăng kân păn ro tơkŭm ƀă kơxô̆ ki mê lối 100 to, ki u ối mâu rơpŏng kuăn pơlê păn. Klêi kơ’nâi hên hơnăm mơ-eăm hnê tối, nôkố kuăn pơlê hiăng ‘nâi túa păn tro tiô khoa hok, pro pơxúa hên tơdroăng tâ.    

“Ing tơdroăng păn tung kơdroăng tiah mê tơdroăng mơdât pơreăng, mơngế ki păn hiăng ‘nâi răk ngăn krâu khât tâ mâu kơpôu ro. Peăng kơvâ ngăn pơkeăng pơlât mơnăn kô rak ngăn tơdroăng pâk mơdât pơreăng châ pêi krâu tâ ƀă châ tơnêi têa rak ngăn tro tâ tâi tâng mâu mơnăn păn‘’.

Dak Lak nôkố ai tâi tâng kơpôu, ro dâng 280 rơpâu to. Klêi hên hơnăm hnê tối, kuăn pơlê hiăng pơ’lêh túa păn, hriâm ing dêi rơpó vâ pơ’lêh ing tơdroăng păn kơ’nêi lôi mâu kơpôu ro, chiâng păn kroăng tung kơdroăng lơ păn kơ’nêi tung kơdroăng kân rơdâ hlối tăng ăm nhâ rêi. Xua mê, tơdrêng ƀă tơdroăng tăng mơdrăn chĕm, ăm lĕm hyôh kong prâi, hbrâ mơdât pơreăng mê ki tơƀrê dêi mơnăn păn xuân rế ton rế châ pơ’lêh tơƀrê, pro pơxúa hên tâ ăm mơngế ki păn.