Cho rơpŏng kơtiê dêi Ƀuôn Čư̆ Kanh, cheăm Ea Sin, tơring Krông Ƀuk, kong pơlê Dak Lak, apoăng hơnăm 2023, jâ H’Yam Mlô, châ kơjo kum 1 to ro kơdrâi vâ păn vâ ai kuăn vâ pro hdrê păn rĕng hluăn kơtiê. Klêi vâ chê 2 hơnăm, ƀă tơmâng khât dêi khu grup, malối cho hnê mơhno kơhnâ khât dêi kăn ƀô̆ ngăn pơkeăng pơlât mơnăn tung tơdroăng păn ro kơdrâi nôkố, hngêi jâ H’Yam hiăng ai tơ’nôm 1 to ro kŭn xua ro kăn ki păn mê nah ai kuăn. Jâ H Yam phiu ro tối:

‘’Kơnôm veăng gum ing mâu kăn kong pơlê, rơpŏng hngêi á hiăng ai ro vâ păn, kô mơ-eăm păn rak ngăn dêi ro vâ ro ai hên kuăn klêi mê păn ăm kân kô châ tê tăng liăn rôe phái, kế kân rế mơ-eăm hriâm ăm mâu kuăn ‘nĕng lăm hriâm’’.

‘Nâi nhên ki hlâu dêi pơlê ƀă cheăng ngăn a mâu tơdroăng pơkâ dêi Khu kăn Đảng ƀô̆ rêm râ ‘na kơdroh kơklêa săm kơtiê krá tơniăn, Đảng bô̆ cheăm Ea Sin, tơring Krông Ƀúk, kong pơlê Dak Lak hiăng mơjiâng pơkâ pơkuâ ngăn mơnhông cheăng kâ hneăng hơnăm 2020-2025. Tung mê, pơkâ tơdroăng cheăng pêi, troăng hơlâ ki nhên, tơtro ƀă tơdroăng ki ai khât a cheăm. Pơ’lêh tơdroăng pêi pro trâu tâ, ai pơxúa tâ.

Tơdrêng amê, mơdêk hnê tối, mơhnhôk kuăn pơlê xúa ki rơkê khoa hok kih thuât tung pơ’lêh hdrê loăng pêt mơnăn păn, djâ pêt hdrê ki nếo tơƀrê tung pêi chiâk. Pôa Vũ Văn Tuấn, kăn hnê ngăn Đảng ủy cheăm, ăm ‘nâi:

‘’Cheăm Ea Sin hiăng pơ’lêh pơkâ mơnhông pêi tung tơrêm hơnăm. Ing tơdroăng pêi pro mê kuăn pơlê cho ki xiâm, mơnhông hnoăng cheăng pêi dêi tá khu xiâm kal kí. Ing mâu hơnăm tơdroăng ki tơƀrê kơdroh klêa kơtiê, hiăng pêi hlo tơƀrê. Malối cho tơdroăng ki hlê plĕng kuăn pơlê tung tơdroăng kơdroh kơklêa xăm kơtiê hiăng châ mơnhông tơƀrê nhên, kuăn pơlê hiăng ‘nâi xúa túa pêi cheăng kâ, hriâm ing dêi rơpó vâ mơnhông hlŭn kơtiê. Hiăng ai hên rơpŏng kuăn pơlê mơ-eăm mơnhông cheăng kâ’’.

Pakĭng mê, ƀă mâu tơdroăng kơjo veăng gum ing tơdroăng kơdroh kơklêa xăm kơtiê, pro têa krúa mơgrúa hyôh kong prâi, kơjo kum mung liăn ing mâu hngêi rak liăn hiăng kum kuăn pơlê tơ’lêi châ ‘no liăng mơnhông tơƀrê. Troh nôkố, kơxô̆ rơpŏng kơtiê dêi cheăm Ea Sin hiăng xăm ing lối 57% (hơnăm 2021) chu ối 39,8% (hơnăm 2023) pêi lo liăn riên rêm ngế xuân tâk ing mâu hơnăm.

Ing túa pêi cheăng ‘’Xăm kơtiê krá tơniăn’’ a cheăm Ea Sin, Khu kăn Đảng ƀô̆ tơring Krông Ƀuk, kong pơlê Dak Lak hiăng tơbleăng, po rơdâ mâu cheăm tung tơring. Vâ achê tâ cheăm, Khu kăn Đảng ƀô̆ tơring ối xoăng tơdroăng cheăng ăm râ ủy rêm khế ‘na tơdroăng tơkŭm hôp dêi chi ƀô̆ thôn, pơlê vâ ‘nâi mâu tơdroăng púi vâ dêi kăn ƀô̆, đảng viên ƀă kuăn pơlê, teăm tah tơdroăng xơpá, tơvâ tơvân tung tơbleăng pêi cheăng kâ a pơlê cheăm. Pôa Nguyễn Hải Đông, Kăn hnê ngăn Đảng tơring Krông Ƀúk, kong pơlê Dak Lak ăm ‘nâi:

‘’Tơring hiăng hnê mơhno ăm mâu kăn ƀô̆ đảng viên  pơkuâ tăng ngăn pơlê cheăm xuân môi tiah kăn ƀô̆ 7 to cheăm đi đo veăng hôp ƀă chi ƀô̆ cheăm. Mô mơnêi tăng ngăn ƀă tối mâu tơdroăng pêi pro mâu pơkâ ki kal vâ pêi tơdroăng pơkâ kum kơdroh kơklêa xăm kơtiê vâ rế ton rế tro tâ”.

Tơring Krông Ƀuk, kong pơlê Dak Lak nôkố ai lối 30 khu pêi cheăng Đảng ƀă lối 180 chi ƀô̆ dêi mâu Đảng ƀô̆ cheăm bêng. Kơnôm pơtối rak vế pêi pro tro hnoăng cheăng pơkuâ, hnê mơhno tung tơdroăng mơnhông cheăng kâ rêh ối dêi a kong pơlê, mê 16 tơdroăng pơcháu pêi ‘na mơnhông cheăng kâ, rêh ối dêi tơring tung hơnăm 2023 hiăng châ ƀă luâ pơcháu. Tung kơxô̆ rơpŏng xăm kơtiê 1% (châ 100% pơkâ); kơxô̆ rơpŏng kơtiê dêi cheăm ki xơpá xăm 6,97% (châ 116% pơkâ). 

Tơring xuân hiăng mơjiâng 74 túa pêi cheăng xúa khoa hok kŏng ngê̆, kơmăi kơmok, hdrê loăng pêt, mơnăn păn nếo pro pơxúa ‘na cheăng. Tơdroăng rêh ối dêi kuăn pơlê rế tơniăn. Ing mê, veăng pro tơƀrê Pơkâ Hneăng hôp Đảng ƀô̆ tơring Krông Ƀúk, hneăng hơnăm 2020 - 2025 hiăng pơkâ, mơjiâng tơring rế mơnhông tơƀrê.