Dế păn dêi 2 to ro sind kơdrâi nếo châ tơnêi têa gum ăm kơtăn kố lối 1 khế tung tơdroăng tơkêa pro pơhlêh tơdroăng cheăng kâ, mơnhông túa kơdroh kơtiê ối tung Tơdroăng pơkâ Tơnêi têa kơdroh kơtiê krá ton, pơla hơnăm 2021-2025, pôa Trần Ngọc Phương ối a cheăm Thuận Hòa, tơring Châu Thành ôh tá kơtôa tơdroăng hơniâp ro, xua ƀă tơdroăng tŏng gum kố, rơpŏng pôa kô ai tơ’nôm liăn vâ tơniăn tung rêh ối cheăng kâ. Nôkố pôa Phương hiăng pêt tơ’nôm nhâ ăm ro rêi, tơdrêng amê hlối mung 3 ngế pêi tơnêi kơdrum vâ pêt tơ’nôm loăng táo hồng ƀă tơngah dêi rơpŏng kô pêi lo liăn tơniăn, rĕng hluăn ing kơtiê. Pôa Trần Ngọc Phương, tối:

“Châ tơnêi têa tŏng gum á kô mơ-eăm, pro tiah lâi pêi châ tơƀrê khât. Á xuân hiăng pêt nhâ, kơdroăng păn á hiăng pro klêi, ƀă kih thuât păn mê á dế hriâm”.

Tơdroăng pơkâ tơnêi têa kơdroh kơtiê krá ton, Tơdroăng pơkâ tơnêi têa mơjiâng thôn pơlê nếo, Tơdroăng pơkâ tơnêi têa mơnhông cheăng kâ rêh ối pơlê pơla kơpong hdroâng kuăn ngo, rơtế ƀă hên tơdroăng tơkêa, troăng hơlâ tŏng kum hdroâng kuăn ngo ki ê châ rêm râ, mâu kơvâ cheăng tung kong pơlê Sóc Trăng hnê mơhno pêi pro châ tơƀrê hên khât. Ing mê, hiăng veăng gum ăm rơpŏng kơtiê, rơpŏng vâ chê kơtiê tối tơdjuôm ƀă rơpŏng kơtiê, rơpŏng vâ chê kơtiê tối krê rế hía rế hơ’lêh tơdroăng rêh ối, mơnhông cheăng kâ, mơ-eăm hluăn ing kơtiê.

‘Na tơring Trần Đề nôkố, ngin hlo ‘na tơdroăng ki hơ’lêh hên a kơpong hdroâng kuăn ngo. Mê cho mâu kông, troăng prôk pơla hơnăm 2019 – 2024, tơring hiăng mơjiâng pro nếo 519 to, pro klêi ƀă hiăng ăm xúa 451 to tơmeăm ki pro. Hên mâu tơmeăm pro ki ai pơxúa ăm pơlê pơla ƀă hiăng ăm xúa tơƀrê ai pơxúa, veăng kum mơdêk cheăng kâ rêh ối pơlê pơla mơnhông, hơ’lêh ngiâ méa thôn pơlê. Pôa Thạch Soi, ối a kơtâu Hội Trung, pơlê kân Lịch Hội Thượng, phiu ro tối:

“Tơnêi têa vâi tơmâng ngăn khât troh tơdroăng rêh ối kuăn pơlê malối cho kuăn pơlê hdroâng kuăn ngo. Ki nhên, hdrối nah troăng prôk ki kố bu rơdâ 2m, mê nôkố hiăng po rơdâ 3m, kuăn pơlê xuân vâ môi tuăn tŏng kum, pleăng tơnêi ăm tơnêi têa pro troăng, ing mê, tơdroăng ki prôk lăm dêi kuăn pơlê chiâng tơ’lêi hlâu, kuăn ‘nĕng lăm hriâm xuân tơniăn”.

Ing kơxô̆ liăn xoăng lối 103 rơtal liăn ing Tơdroăng pơkâ dêi tơnêi têa mơnhông cheăng kâ rêh ối pơlê pơla kơpong hdroâng kuăn ngo ƀă Tơdroăng pơkâ tơnêi têa kơdroh kơtiê krá ton, pơla hơnăm 2021-2025; tơring Trần Đề hiăng tŏng gum hngêi ối ăm 344 rơpŏng, tŏng gum tơnêi ối ăm 37 rơpŏng, hnê cheăng pêi ăm lối 360 rơpŏng, tŏng gum têa ôu kâ hum roh ukố utá ăm lối 190 rơpŏng; ‘no liăn pro 28 to kong, troăng prôk tung thôn pơlê, kơtâu, cheăm malối xơpá.

Pakĭng mê, pro ƀă ‘mêng kơchơ kơpong hdroâng kuăn ngo, gum pêt mơjiâng tơmeăm, tŏng hên tơdroăng rêh ối ăm pơlê pơla, hnê cheăng pêi ƀă hên ki ê. Pôa Trịnh Văn Bé, kăn phŏ hnê ngăn Vi ƀan tơring Trần Đề ăm ‘nâi, tơring đi đo mơnhên hnoăng cheăng tŏng kum hdroâng kuăn ngo ƀă troăng hơlâ tŏng gum hdroâng kuăn ngo cho hnoăng cheăng ki kal, xua mê, tung la ngiâ ah, tơring kô tơkŭm pêi pro hên troăng hơlâ vâ tơbleăng pêi pro châ tơƀrê hên má môi.

“Tơkŭm kơjo ‘no liăn pêi cheăng ăm mâu cheăm, kơtâu ki malối xơpá môi tiah: tŏng gum ăm tơnêi ối, tơnêi pêi, têa ôu kâ hum roh; gum pêt mơjiâng hên túa tŏng kum rêh ối pơlê pơla; ‘no liăn pro hngêi trăng troăng klông ki ai, xúa tung pêi cheăng kâ, tơdroăng rêh ối tung kơpong hdroâng kuăn ngo. ‘Mâi mơnhông troăng hơlâ kal kí a tơring cheăm, tơtrŏng hnê tơ’nôm, mơdêk ivá cheăng dêi kăn ƀô̆, malối cho kăn ƀô̆ kuăn pơlê hdroâng kuăn ngo. Kơjo hnê mơjiâng mâu ngế cheăng, mơdêk hiâm mơno rơkê plĕng dêi kuăn pơlê tro ƀă hnê mơhno, hnê cheăng pêi, tăng cheăng pêi ăm kuăn pơlê hdroâng kuăn ngo”.

Tiô pôa Lâm Văn Mẫn, Kăn pơkuâ hnê ngăn Đảng kong pơlê Sóc Trăng hiăng tơkâ luâ pơla hơnăm 2019-2024 ki pá puât ƀă hên tơdroăng ki ôh tá tơniăn kân. Tung pơla mê, xua tơdroăng ki pơkuâ dêi khu pơkuâ hnê ngăn Đảng, khu kăn pơkuâ ƀă kuăn pơlê tung kong pơlê, malối cho kuăn pơlê mâu hdroâng kuăn ngo hiăng mơdêk khôi hmâ tơrŭm, hiâm mơno pâ nhuô̆m tơnêi têa, mơ-eăm tơ’noăng; mơ-eăm tơkâ luâ pá puât, pơloăng mơnúa, pêi pro châ hên mâu tơdroăng ki ƀlêi chiâng ki kân. Tung pơla hơnăm 2019-2024, cheăng kâ dêi kong pơlê pơtối hlo rế hía rế mơnhông.

Krê 6 khế apoăng hơnăm 2024, tiô riân châ lối 6,5%, hên tâ tâng pơchông ƀă pơkâ tơdjuôm tung lâp tơnêi (6,42%), ối má 6 tung kơpong tơbăng kroăng Cửu Long, GRDP rêm ngế riân troh mơ’nui hơnăm 2023 châ lối 60 rơtuh liăn/ngế/hơnăm.

Pôa Lâm Văn Mẫn xuân tối nhên, ing kơxô̆ liăn ‘no dêi 3 Tơdroăng pơkâ dêi tơnêi têa châ tŏng gum, tơbleăng pêi pro tơƀrê vâ ‘no liăn pro, ‘mêng rơnêu, pro nếo mâu troăng prôk cheăng kâ rêh ối pơlê pơla kơpong hdroâng kuăn ngo, kơnôm mê, troh nôkô, tâi tâng mâu cheăm pơrá ai troăng rơxế kân prôk troh a tíu xiâm; lối 99% rơpŏng châ ôu têa krúa tro tiô pơkâ lối 99,6%. Malối, hnoăng cheăng kơdroh kơtiê a kơpong hdroâng kuăn ngo ai tơdroăng ki pơhlêh tơƀrê khât; tung lâp kong pơlê hiăng tŏng gum pơhlêh cheăng pêi ăm 4.600 rơpŏng ƀă 67 túa mơnhông cheăng kâ, veăng gum pro hên túa cheăng kâ ăm pơlê pơla ƀă kơdroh kơtiê krá ton Riân troh mơ’nui hơnăm 2023, a kong pơlê ối ai lối 4 rơpâu rơpŏng kơtiê cho kuăn pơlê hdroâng kuăn ngo, kơdroh lối 6.500 rơpŏng tâng pơchông ƀă hơnăm 2021.

“Kơxô̆ rơpŏng kơtiê kơdroh 2%/hơnăm; tung mê, kơdroh kơxô̆ rơpŏng hdroâng kuăn ngo Khmer kơtiê 3%/hơnăm. Mâu troăng hơlâ tŏng kum rêh ối pơlê pơla châ pêi pro teăm tơdrêng, tro mơngế. Tung pơla hơnăm 2019-2024, kong pơlê hiăng tŏng gum pro 14.826 toăng hngêi ăm mâu rơpŏng kơtiê; tung mê, ai 6.184 toăng hngêi ăm mâu rơpŏng kơtiê kuăn pơlê hdroâng kuăn ngo...”.

Mâu tơdroăng ki pêi pro tơƀrê pơxúa mê cho ivá khŏm mơ-eăm ‘na tơdroăng kal kí ƀă tơdroăng hnê mơhno, pơkuâ kơtăng dêi kăn pơkuâ hnê ngăn Đảng, khu kăn pơkuâ rêm râ tung kong pơlê Sóc Trăng, pakĭng mê cho ivá mơ-eăm tơkâ luâ pá puât dêi kuăn pơlê mâu hdroâng kuăn ngo a kong pơlê, ing mê, hiăng rế hía rế pro “pơhlêh ngiâ méa” kơpong hdroâng kuăn ngo.