Troh nôkố, pơreăng châi klêa chu châu Phi hiăng ai a 66 rơpŏng ối tung 17 cheăm dêi 10 tơring, pơlê kong krâm, pơlê kong kơdrâm dêi kong pơlê Dak Lak, pro hlâ ƀă prâu tah lối 510 to ƀă tâi tâng lối 24 tâ̆n. Nôkố u ối 6 tơring pơreăng xuân tá hâi hluâ 21 hâi. Ƀă pơreăng êi kéa lo po pom a kơpôu ro, tung măng tĭng, pơreăng xông tâ tú a 2 rơpŏng a pơlê kân Ea Pôč, tơring Čư Mgar ƀă cheăm Hoà Phú, pơlê kong kơdrâm Ƀuôn Ma Thuột, kong pơlê Dak Lak, tâi tâng kơxô̆ ki prâu tah 300kilô.

Troăng pêi sap ing apoăng hơnăm troh nôkố, a Dak Lak hlo ai 4 tíu pơreăng êi kéa lo po pom a kơpôu ro a tơring Ea Súp, tơring Čư Mgar ƀă pơlê kong kơdrâm Ƀuôn Ma Thuột, pro tro tâ pơreăng 9 to, prâu tah 4 to, tâi tâng kơxô̆ prâu tah lối 450 kilô. Hơnăm kố, kong pơlê mơ’no vâ chê 29 rơtal liăn ngân Tơnêi têa vâ mâu tơring tơkŭm po mâu troăng hbrâ mơdât pơreăng kơpôu ro chu, í peâp.