Tiô Khu ngăn vâi kơdrâi kong pơlê Dak Lak, tung mâu hơnăm hdrối, vâi kơdrâi hơnăm hiăng hên a kong pơlê kố kơhnâ veăng pêi hên mâu tơdroăng cheăng tung mơhnhôk “Mâu hơnăm hiăng hên tơ’noăng pêi cheăng kâ rơkê’’; mơjiâng rơpŏng hngêi “5 ôh, 3 krúa” rơtế ƀă “Mơjiâng rơpŏng hngêi mơhno túa lĕm tro, tơtô, hơniâp, rơkê, plĕng”...

Rêm râ khu ai hên tơdroăng pêi pro krê ăm vâi kơdrâi hơnăm hiăng hên, vâ rak ngăn ƀă pơtối rak vế hnoăng cheăng dêi vâi kơdrâi tung rơpŏng hngêi ƀă tung kuăn pơlê; tơ’mot hên khu vâi kơdrâi hơnăm hiăng hên veăng. A hneăng hôp, mâu kăn hiăng rơtế veăng trâm mâ, tơpui tơno túa pêi tro, ‘ló, tơƀrê tung tơdroăng tơrŭm tơbleăng mơhnhôk mơjiâng rơpŏng hngêi “5 ôh 3 krúa” rơtế ƀă tơdroăng “Hơnăm hiăng hên djâ troăng lĕm’’ ƀă mơjiâng thôn pơlê nếo a mâu kuăn pơlê ối. Rôh kố, Khu tơkŭm po hiăng khĕn kơdeăn ăm 30 ngế kơdrâi hơnăm hiăng hên ai hnoăng kơhnâ rơkê tung pêi cheăng.