Sap apoăng hơnăm troh nôkố, Khu ngăn vâi kơdrâi kong pơlê Phú Yên tơrŭm ƀă rêm râ khu mơdêk hnê tối, tơkŭm pêi hên tơdroăng cheăng vâ pêi ai pơxúa tơdroăng tơkêa bro 8- pêi pro ôh tá pơrah vâi kơdrâi ƀă  tơleăng mâu tơdroăng kal ƀă vâi kơdrâi ƀă vâi hdrêng  kơpong kuăn ngo. Khu vâi kơdrâi kong pơlê Phú Yên  hiăng tơkŭm  tơbleăng 63 tôh hnê tối tơbleăng tung kuăn pơlê. Rêm Tôh ai 10 ngế mê cho Bí thư chi ƀô̆, kăn thôn, Chi hô̆i trương vâi kơdrâi, Ngế pơkuâ Ban công cheăng Măt trâ̆n ƀă mâu khu a pơlê.

Rêm khế, tôh hnê tối tung kuăn pơlê tơkŭm iâ gá 1 tơdroăng hnê tối, hên tơdroăng tơbleăng hbê, rah xo mâu tơdroăng hnê tối ki lâi ăm tơtro ƀă tơrêm ngế veăng. Tôh hnê tối tung kuăn pơlê đi đo troh pôu rêm hngêi kuăn pơlê tăng ngăn vâ tăng ‘nâi tơdroăng púi vâ dêi kuăn pơlê. Klêi mê, tơkŭm tơdroăng hnê tối  rơtế tơleăng mơnhên mâu tơdroăng ối tơvâ tơvân ki xơpá dêi kuăn pơlê tung mâu rôh hôp thôn. Pakĭng tơdroăng kal môi tiah mơhnhôk, hnê kuăn pơlê mơnhông pêi cheăng kâ, tôh hnê tối tung kuăn pơlê ối tơmâng hnê vâi hdrêng, ví ai tơdroăng tơhôu tôu pâm tung rơpŏng hngêi ƀă pôi tá ai tơdroăng xo on veăng tá hâi tro hơnăm; tah túa tơlá ki châi tamo lơ krếo pôa pơchâu xối xeăng ƀă hnê kuăn pơlê tâng tamo thế lâm pôu khăm pơlât a hngêi pơkeăng. O Hồ Ngọc Kim Linh ối acheăm Sơn Hội, tơring Sơn Hòa ăm ‘nâi.

“ A vâ veăng tung tôh hnê tối mê vâ hlê plĕng hên tâ ƀă vâ ví mâu tơdroăng ki ôh tá tro. Kô pro pơxúa  ăm tơdroăng rêh ối ƀă kô ăm tơná o hlê hên tâ, ăm o ‘nâi tơdroăng ki lâi tro ki lâi ôh”.

Tiô jâ Hà Thị Thìn, Kăn xiâm hnê ngăn Khu ngăn vâi kơdrâi cheăm Ea Trol, tơring Sông Hinh, tung tơdroăng mơ-eăm  mơdât pôi tá rĕng xo on veăng tá hâi tro hơnăm  tối krê, hbrâ mơdât pro pơlăm pơlối vâi o tối tơdjuôm, Khu ngăn vâi kơdrâi  cheăm rơtế ƀă mâu khu râ, kơvâ cheăng, khu grup dêi cheăm hiăng lăm troh a mâu thôn, pơlê vâ hnê kuăn pơlê tiô rêm khế pơkâ, rêm hneăng.

“ Klêi xo hlá mơ-éa pơtroh dêi Tíu xiâm xuân môi tiah kong pơlê, tơring, mê Khu ngăn vâi kơdrâi xuân hiăng chêh mâu tơdroăng pơkâ pêi. Klêi mê cho tơbleăng pơkâ ki mê troh a thôn pơlê ki pêi tơdroăng tơkêa bro 8 klêi mê a kô tơbleăng luât troh a thôn pơlê ba ahnê ăm tơrêm to thôn xuân ai mơjiâng mâu tơdroăng  vâ pêi pro ôh tá pơrah pơla kơdrâi ƀă kơnốu, klêi mê a ối mơjiâng túa pêi cheăng tối ôh ƀă tơdroăng rĕng xo on veăng , pêi pro 5 tơdroăng tơdjêp ƀăng tung pêi 3  krúa. Hmếo môi tiah mê pái khế môi hdrôh mê a xuân mơhnhôk thê tơkŭm po hôp vâi kơdrâi drêng mê hlối hnê tối tơdroăng ki pôi tá pơrah vâi kơdrâi”.

Jâ Nguyễn Thị Phương Liên, Kăn phŏ ngăn Khu ngăn vâi kơdrâi  kong pơlê Phú Yên ăm ‘nâi, tung pơla hdrối kố hía nah, Khu ngăn vâi kơdrâi  kong pơlê Phú Yên hiăng tơrŭm ƀă Khu xiâm ngăn cheăng pêi Mố đô̆i tro rong ƀă rêh ối pơlê pơla kong pơlê  tơkŭm po  mâu lâm hnê vâ mơdêk hlê plĕng ăm mâu kăn ƀô̆ rêm râ tơring, cheăm hlê tơdroăng tơleăng mơnhên mâu tơdroăng ai tơdjâk troh tôu pâm dêi on veăng lơ ‘nêk vâi kơdrâi  ƀă vâi hdrêng tungkơpong hdroâng kuăn ngo ƀă kong ngo.

Khu ngăn vâi kơdrâi kong pơlê Phú Yên xuân hnê mơhno rêm râ khu vâi kơdrâi a pơlê cheăm po rơdâ túa  pêi pro ki ai pơxúa  xuân môi tiah troăng hơlâ, túa tơleăng mâu tơdroăng pêi pro  ƀă pêi tro mâu túa cheăng dêi Tôh tơbleăng tối tung kuăn pơlê dêi tơdroăng Tơkêa bro 8:

“ ƀă tơdroăng pơkâ troh hơnăm 2025 mê kô mơjiâng châ 63 tôh mê nôkố hiăng mơjiâng châ 45 tôh ƀă 430 ngế veăng. Mâu tôh ki mê hiăng châ Khu ngăn vâi kơdrâi  hriâm tâp ‘na mâu tơdroăng vâ hlê plĕng ƀă tơdroăng vâ hnê tối ăm mâu ngế tung ối tung tôh’’.

Tơdroăng tơbleăng pêi tơdroăng Tơkêa bro 8 cho tơdroăng tơ’lêi hlâu vâ Khu ngăn vâi kơdrâi  rêm râ ƀă mâu kơvâ cheăng ki tơdjâk troh, mâu kăn cheăm, tơring, kong pơlê  tơmâng khât troh vâi kơdrâi ƀă vâi hdrêng kuăn ngo, mê cho mâu ngế ki chiu pá xêh; mơnhông hnoăng ki  pơcháo vâi kơdrâi mơ-eăm, mơhno ki rơdêi dé vâi kơdrâi, vâi hdrêng tung mơjiâng ƀă mơnhông mơdêk tung kuăn pơlê, veăng mơjiâng kong pơlê Phú Yê xông  tơtêk  krá tơniăn ton./.