Mâu hâi mơ’nui măng tĭng, pôa Điểu Xem krâ pơlê, kuăn ngo M’Nông, ngế mô đô̆i hneăng hdrối, ngế kuăn pơlê pâ nhoăm tung pơlê a Dak Blao pơlê kân Kiến Đức, tơring Dak Rlâp, kong pơlê Dak Nông rơtế ƀă khu rak ngăn pơlê lăm pôu tơrêm rơpŏng kơtiê tung pơlê. Krâ pơlê ăm ‘nâi, rêm hngêi ai môi tơdroăng rêh ối phá, ai mâu ki hmâ achê, hmâ tơrêm rơpŏng mê nếo pơtối rak ki mơ-eăm kơjo kum ing Tơnêi têa troh kuăn pơlê.

Mâu rơpŏng châ râng a kŏng, hnê cheăng pêi, hlối châ kơjo kum ‘na tơmeăm mê cho hdrê pêt, hnê kih thuât pêt rak ngăn, hlối mơhnhôk thế mơ-eăm. Tiô pôa Điểu Xem, krâ pơlê, ing tơdroăng môi tuăn kum dêi rơpó tung pơlê tơniăn vâ rế ton rế mơnhông tơƀrê.

“Kuăn pơlê tung pơlê vâ môi tuăn, rơtế hmâ, mơhnhôk dêi rơpó mơ-eăm pêi cheăng kâ, mơnhông cheăng kâ rế tơƀrê. Pơlê tơniăn hlối châ Đảng, Tơnêi têa tơmâng ngăn khât, kơjo gum ‘no liăn mơjiâng tơmeăm khoăng, gum ăm kuăn pơlê mung liăn pêi cheăng kâ vâ  mơnhông tơdroăng rêh ối dêi kuăn pơlê rế xông tơƀrê’’.

A cheăm tơkăng kong Quảng Trực, tơring Tuy Đức, kong pơlê Dak Nông, hnoăng cheăng dêi krâ pơlê, ngế kuăn pơlê pâ nhoăm xuân châ pơtối rak vế pêi pro tung tơdroăng veăng rak ngăn tơniăn kơpong tơkăng kong ƀă mơnhông cheăng kâ. Pôa Điểu Đi krâ pơlê ƀon Bu Prăng 2, cheăm Quảng Trực, ăm ‘nâi, môi tuăn tiô Đảng, tiô kăch măng, tơdroăng rêh ối dêi kuăn pơlê rế phâi tơtô, tíu tơkăng kong pơ’lêh tơrêm hâi.

“A rơxông ai tơdroăng tơplâ nah mê rơxông á veăng tơplâ há, vâ kring vế Tơnêi têa ƀă kring vế kơpong tơkăng kong kố. Nôkố hiăng hơniâp, tơniăn lĕm, mâu đảng viên, mâu lêng hneăng hdrối thế djâ troăng lĕm ahdrối mơhnhôk kuăn pơlê pơtối râk ki môi tuăn dêi rơpó, mơ-eăm pêi cheăng kâ, mơnhông tơdroăng rêh ối ƀă kring vế tơniăn tíu tơkăng kong kố ''.

‘Nâi mâu krâ pơlê, mơngế kuăn pơlê pâ nhoăm ai hnoăng pêi kal khât, ing hơnăm 2013, khu kăn pơkuâ hnê ngăn Đảng kong pơlê Dak Nông hiăng pơkâ tơdroăng Tơkêa bro 05 ‘na mơjiâng khu ki xiâm tung kơpong kuăn ngo. Troh nôkố, mâu ki kố ai vâ chê 500 ngế, hbrâ tŭm tơdroăng ki tơná hlê ‘na troăng hơlâ dêi Đảng, luât Tơnêi têa, tơdroăng vâ hnê mơhnhôk kuăn pơlê tung tơdroăng rêh ối nếo nôkố.

Ing mê, vâi kô hbrâ, kơhnâ pêi tro tơdroăng ki lĕm ing tuăn tơmiât púi vâ dêi kuăn pơlê, thế hnê tối teăm tơdrêng mâu tơdroăng ki nếo a pơlê cheăm vâ ai troăng tơleăng mơnhên.

Xuân ing tơdroăng mơhnhôk dêi mâu ngế kuăn pơlê pâ nhoăm hiăng gum kuăn pơlê ‘nâi hbrâ rơnáu, tơplâ, mơdât mâu khu ki ‘mêi hriăn pơlông djâ pro tơdroăng ôh tá tro, lơ xúa tơdroăng ‘na kuăn ngo, tơdroăng loi tĭng tiô khôp. Hên tơdroăng ki ôh tá môi tuăn, tơbriât tơhôu dêi rơpó châ pơlĕm ing pơlê cheăm. Pakĭng mê, mâu ngế ki kô hiăng mơ-eăm veăng tơ’noăng pâ nhoăm tơnêi têa, mâu tơdroăng mơhnhôk pêi pro tơdroăng ki lĕm tro a pơlê cheăm xuân môi tiah tâi tâng kuăn pơlê môi tuăn mơjiâng thôn pơlê nếo, kơdroh kơklêa xăm kơtiê krá tơniăn.

Pôa Hồ Văn Mười, Kăn phŏ pơkuâ hnê ngăn Đảng kong pơlê, Kăn hnê ngăn Vi ƀan kuăn pơlê kong pơlê Dak Nông tối, pơtối rak vế pêi pro tơdroăng cheăng dêi mâu đảng viên, mâu ngế kuăn pơlê pâ nhoăm tung kơpong hdroâng kuăn ngo cho hnoăng cheăng ki kal dêi rêm râ, mâu kơvâ cheăng vâ kong pơlê mơnhông tơƀrê.

“Rêm râ ủy, mâu kăn hbrâ tơkŭm po tơdroăng pơtối rak vế pêi pro hnoăng cheăng dêi mơngế pâ nhoăm, mâu ki xiâm, pơtối mơjiâng, mơnhôk mâu kuăn pơlê pâ nhoăm tung kơpong kuăn ngo; pơtối mơjiâng ƀă po rơdâ vâ hên mâu ngế rơkê tung veăng mơnhông cheăng kâ, mơhno túa lĕm tro rêh ối pơlê pơla, kring tơniăn cheăng a mâu pơlê, cheăm, tơring, veăng mơjiâng pơlê xiâm Dak Nông rế ton rế kro mơdrŏng”.

Tối tro hnoăng cheăng dêi mâu ngế ki kuăn pơlê pâ nhoăm tung hdroâng kuăn ngo, ai luât pơkâ tơtro vâ pơtối rak vế hên hnoăng cheăng “Mâu ngế ki xiâm dêi pơlê”, hiăng veăng gum kong pơlê Dak Nông rak tơniăn tơdroăng kal kí, châ tơƀrê mâu hnoăng mơnhông cheăng kâ, hiăng hluăn ing kong pơlê kơtiê ƀă dế mơ-eăm vâ mơnhông chiâng kong pơlê pêi cheăng tơƀrê dêi kơpong Tây Nguyên.