Khu xiâm ngăn chiâk deăng ƀă Mơnhông thôn pơlê Việt Nam ƀă Khu xiâm ngăn tơdroăng ki nâp hnoăng liăn mơhá tơkăng kong Sinuâ nếo kĭ Pơkâ kơthô pơtroh pơkâ thế rak tơniăn mâu kế tơneăm plâi sầu riêng ki pro hngíu dêi Việt Nam tê ngi kong têa Sinuâ. Ƀă pơkâ kơthô nếo châ kĭ tơkêa, tiô tối hdrối kơxô̆ liăn châ xo ing tê plâi sầu riêng ki pro hngíu ngi kong têa ê dêi Việt Nam tung hơnăm 2025 mơni kô châ 300 rơtuh dollars Mih.

A kong pơlê Dak Lak, tíu ki ai ƀăng tơnêi pêt plâi sầu riêng ối má 2 tung lâp tơnêi têa, kong pơlê kố dế hbrâ rơnáu, vâ pêi pro tiô  tơdroăng pơkâ thế púi vâ veăng tung tơdroăng ki tê plâi ngi kong têa ê drêng Pơkâ kơthô kố châ xêt khât. Dak Lak ai vâ chê 33 rơpâu ha sầu riêng, plâi gá châ lối 280 rơpâu tâ̆n. Tung lâp kong pơlê hiăng ai 23 to tíu ki tâ tung kơhôp ƀă 68 to kơpong pêt châ hbru ăm mah kơxô̆ vâ tê plâi sầu riêng ngi kong têa Sinuâ.

Tơdroăng ki Khu xiâm ngăn chiâk deăng ƀă Mơnhông thôn pơlê Việt Nam ƀă Khu xiâm ngăn nâp hnoăng liăn mơhá tíu tơkăng kong Sinuâ kĭ pơkâ kơthô ‘na tơdroăng ki tê plâi sầu riêng ki pro hngíu ngi kong têa ê hiăng po hên rôh tơ’lêi hlâu ăm kơvâ pêt plâi sầu riêng Việt Nam tối tơdjuôm ƀă Dak Lak tối krê.