Pêi pro tiô Tơdroăng cheăng tung lâp hneăng, Roh hôp má 10 Khu xiâm pơkuâ hnê ngăn Đảng hneăng 13 hôp sap ing hâi lơ 18/9 troh lơ 20/9.2024 a pơlê kong xiâm Hà Nội. Roh hôp má 10 Khu xiâm pơkuâ hnê ngăn Đảng hneăng 13 hiăng tơpui tơno, ăm mâu kăn veăng tơpui tối ‘na tơdroăng ki xiâm: Tơdroăng chêh tối Tơbleăng cheăng kal kí dêi Khu xiâm pơkuâ hnê ngăn Đảng hneăng 13; Tơdroăng chêh tơbleăng Mơgêi mâu rơkong tơpui leăng mơnhên ƀă tơdroăng ki ai păng ‘nâng ‘na hneăng ki pơhlêh nếo tiô pơkâ xah hô̆i chu nghiah tung 40 hơnăm mê hía nah a Việt Nam; Tơdroăng chêh tối Tơbleăng dêi Khu xiâm pơkuâ hnê ngăn Đảng hneăng 13 ‘na Mơgêi hnoăng mơjiâng Đảng ƀă rak vế, pêi pro tiô Luât Đảng; Tơdroăng chêh tối Tơbleăng mơnhên 5 hơnăm rak vế, pêi pro tio Troăng hơlâ mơnhông pêi cheăng kâ-rêh ối pơlê pơla 10 hơnăm, sap ing hơnăm 2021-2030; troăng hơlâ, hnoăng cheăng mơnhông pêi cheăng kâ-rêh ối pơlê pơla 5 hơnăm, sap ing hơnăm 2026-2030; Tối tơbleăng Mơgêi rak vế pêi pro tiô túa pơkâ tung Đảng ‘na tâ phĭu pôk xo kăn tiô Tơdroăng pơkâ kơxô̆ 244-QĐ/TW, hâi lơ 9/6/2014 dêi Khu xiâm pơkuâ hnê ngăn Đảng hneăng XI ƀă tơdroăng pơkâ ‘na ‘mâi rơnêu, mơjiâng tơ’nôm Túa pơkâ ‘na pôk xo kăn tâ phĭu tung Đảng;

Klêi mê, tơdroăng chêh tối Mơgêi hnoăng cheăng ‘na mơngế pro kăn tung Đảng; tơdroăng Mơgêi ‘na tăng rah mơngế tung Khu xiâm pơkuâ hnê ngăn Đảng hneăng 13 ƀă Troăng hơlâ ‘na tăng rah mơngế tung Khu kăn xiâm pơkuâ hnê ngăn Đảng hneăng 14; tối tơbleăng tơdroăng tăng rah xo mơngế cheăng tung Khu xiâm kal kí, Khu hnê mơhno cheăng Đảng hneăng 14 hneăng hơnăm 2026-2031; tăng rah mơngế pro kăn tung Khu xiâm pơkuâ pơkuâ hnê ngăn Đảng hneăng 14, hneăng hơnăm 2026-2031; Tối tơbleăng tơdroăng Pêi pro tung mơnhông pêi cheăng kâ-rêh ối pơlê pơla hơnăm 2024, pơkâ hdrối ‘na Mơnhông pêi cheăng kâ-rêh ối pơlê pơla hơnăm 2025; Tối tơbleăng séa mơnhên tơdroăng ‘no hrê liăn ngân tơnêi têa hơnăm 2024, tơdroăng pơkâ pêi lo, ‘no hrê liăn ngân hơnăm 2025; Tơdroăng pơkâ ‘na liăn ngân vâ ‘no pêi cheăng tơnêi têa 3 hơnăm dêi tơnêi têa hneăng hơnăm 2025-2027; pơkâ mơ’no liăn mơjiâng pro troăng rơxế lơtreng ing Pêa Kơnhŏng troh a Pêa Hdroh tơnêi têa; Tơdroăng pơkâ mơjiâng pơlê kong kơdrâm Huế kô chiâng pơlê kong kân ki ối tung kơvâ dêi Tíu xiâm tơnêi têa; pôk tơ’nôm mơngế pro kăn tung Vi ƀan xiâm seá ngăn tơdroăng cheăng Đảng hneăng 13 ƀă mâu tơdroăng pêi pro kal ki ê.

Pôa Tô Lâm, Kăn xiâm pơkuâ hnê ngăn, Kăn xiâm hnê ngăn tơnêi têa pơkuâ ƀă ai ƀai xông tơpui ki kal a roh pơxiâm po hneăng hôp ƀă mơgêi hneăng hôp.