Hâi apoăng khế 9, a hngêi tê tơmeăm khoăng dêi pôa Nguyễn Quốc Lập achê Troăng kân kong pơlê 1, thôn 5, cheăm Ea Wer, tơring Ƀuôn Đôn, kong pơlê Dak Lak kŏng an cheăm séa ngăn rêm hneăng tơmeăm hbrâ mơdât on chếo. Pôa Lập tối ăm ‘nâi, klêi kơ’nâi châ pơtâng tối, hnê mơhno, lối 1 hơnăm hdrối hiăng veăng ‘’Tôh liên gia rak tơniăn hbrâ mơdât on chếo, tơpâ on chếo. Tíu tê mơdró tơmeăm châ hbrâ kế tŭm tơniăn mơdât, tơpâ on chếo pơtôu mê cho: kơƀin tơpâ on chếo, tơmôu. Krê kơ’lêng tơbleăng hiăng tơdjêp pơla mâu rơpŏng. Pôa Lâp tối ‘na pơkâ pêi cheăng tôh liên gia tơniăn tơpâ on chếo a tíu tê tơmeăm khoăng dêi rơpŏng:

‘’Tung tôh kố mê cho 10 rơpŏng, pơrá châ hbrâ tơmeăm tơpâ on chếo, ƀă tơdjêp ƀă dêi pó. Drêng ai tơdroăng on chếo ƀă tiê kơ’lêng tơbleăng, tŭm 10 rơpŏng kô pơtối tiê kơ’lêng tơbleăng tối chếo, klêi mê mơnhên tíu ki chếo a tíu ki lâi mê rêm ngế kô tơkŭm vâ pêi pro tơdroăng tơpâ on chếo’’.

Tôh liên gia rak tơniăn hbrâ mơdât, tơpâ on chếo châ mơjiâng a cheăm Ea Wer mê cho mâu rơpŏng tê mơdró tơmeăm khoăng, phon rơvât, pơkeăng rak vế hdrê kơchâi plâi, pôm, tíu rơnêu rơxế honđa... achê dêi pó. Ngoh Trần Văn Nam, ngế ối tung tôh liên ai hngêi rơnêu rơxế honđa tối ăm ‘nâi, mâu rơpŏng pơrá veăng tiô tơdroăng ki vâ xêh. Tơdroăng kố vâ tơkŭm mơhnhôk rêm ngế rơtế tơrŭm ƀă châ ngăn môi tiah “mâu kơpeăng kŏng tơdjêp xŏn’’ dêi khu hbrâ mơdât, tơpâ on chếo ƀă tŏng xo mơngế trâm xía vâ.

Tiô ngoh Nam, troăng pêi kum mâu ngế ki veăng ‘nâi tơdroăng pêi cheăng, troăng pêi ƀă hbrâ tơmeăm khoăng vâ hbrâ mơdât on chếo, tơpâ on chếo drêng ai on pơxiâm chếo.

“Ngin châ hbrâ tŭm tơdroăng ki rơkê ‘na hbrâ mơdât on, tơpâ on chếo ƀă tŏng xo mơngế trâm xía vâ tơdrêng. Pakĭng mê, ối hbrâ kơ’lêng chuât tơbleăng, kơƀin tơpâ on chếo, têa, prêi...ƀă mâu tơmeăm ki tơ’lêi chếo mê thế lôi krê, drêng lo pakong lơ ôh po tíu tê thế tơpâ on tơhrik vâ tơniăn hbrâ mơdât on chếo’’.

Ing mâu troăng pêi châ mơjiâng a tơring Ƀuôn Đôn ƀă mâu tơring, pơlê kong krâm, pơlê kong kơdrâm, troh nôkố kong pơlê Dak Lak hiăng mơjiâng châ  303 ‘’Tôh liên gia rak tơniăn hbrâ mơdât on chếo, tơpâ on chếo’’, 71 ‘’Tíu tơpâ on chếo pơlê pơla’’, ƀă 17 ‘’Troăng pêi tâi tâng kuăn pơlê hbrâ mơdât on, tơpâ on chếo a tíu pêi cheăng mâu kơ koan, tíu pêi cheăng ƀă kơpong kuăn pơlê rêh ối’’.

Trung tă Phùng Việt Đức – Kăn phŏ Kăn pơkuâ Ƀơrô Kan sát hbrâ mơdât on chếo, tơpâ on chếo ƀă Tŏng xo mơngế trâm xía vâ Kŏng an kong pơlê Dak Lak tối ăm ‘nâi, ing mâu troăng pêi, khu cheăng đi đo tơkŭm po pêi khât, pơtâp mâu troăng hbrâ mơdât on chếo, tơpâ on chếo kô ai tung tơdroăng rêh ối vâ mâu khu ngế veăng. Ing mê, mâu ngế tung khu tơrŭm cheăng kô châ pêi khât đi đo, mơdêk ivá hbrâ mơdât, drêng ai tơdroăng on chếo, ai tơdroăng pơtôu. Trung tă Phùng Việt Đức tối ăm ‘nâi:

‘’Tung la ngiâ ah, ngin pói vâ tâi tâng kuăn pơlê pơtối vâ môi tuăn, veăng mơjiâng tơ’nôm hên troăng pêi “Tôh liên gia rak tơniăn hbrâ mơdât on chếo, tơpâ on chếo”. Troăng pêi dêi ngin cho tơdroăng hbrâ mơdât on chếo, tơpâ on chếo cho dêi tâi tâng kuăn pơlê, khu pêi cheăng, tơmeăm khoăng, rơxế vâ tơpâ pơrá ai tung kuăn pơlê. Pro ti lâi drêng ai on chếo, rêm ngế kuăn pơlê cho môi ngế lêng hbrâ mơdât on chếo, tơpâ on chếo, vâ ôh tá ăm on chếo rơdâ, chếo kân kơdroh tro lŭp ‘na kuăn mơngế ƀă kế tơmeăm khoăng’’.

Tơdroăng po rơdâ mâu troăng pêi ‘’Tôh liên gia rak tơniăn hbrâ mơdât on chếo, tơpâ on chếo’’ ƀă ‘’Tíu tơpâ on chếo pơlê pơla’’ a kong pơlê Dak Lak cho tơdroăng pêi ki kal, veăng gum mơdêk tơdroăng tâi tâng kuăn pơlê veăng hbrâ mơdât on chếo, tơpâ on chếo tiô hnê mơhno dêi Khu xiâm pơkuâ Kŏng an, ki má lối cho tung pơla ai tơdroăng on chếo, pơtôu ki râ, ôh tá ‘nâi tối hdrối. Ing mê kơdroh tro lŭp ‘na kuăn mơngế ƀă tơmeăm xua on chếo pro.