Mâu hơnăm hdrối mê hía nah, kong pơlê Gia Lai hiăng tŏng gum ngăn khât tung hnoăng cheăng mơjiâng pro mâu tơmeăm khoăng ki hdoăng mơ’no têa krúa a thôn pơlê, vâ gum tơ’lêi hlâu ăm tơdroăng pêi cheăng, rêh kâ ối dêi kuăn pơlê, ki malối a mâu pơlê cheăm hơngế hơngo, kơtiê xahpá, pơlê cheăm dêi hdroâng kuăn ngo. Troh nôkố, kong pơlê Gia Lai ai dâng 160 tơmeăm khoăng ki hdoăng, mơ’no têa krúa a mâu thôn pơlê, dế bê têa vâ ăm kuăn pơlê ôu hum roh jíu. Mâu tơmeăm khoăng ki hdoăng, mơ’no têa mê thăm mơdêk tơdroăng rêh kâ ối dêi kuăn pơlê, malối ƀă vâi krâ-nhŏng o hdroâng kuăn ngo, pơlê cheăm ối xahpá, hơngế hơngo ing pơlê kân xiâm.

Vâ mâu tơmeăm khoăng ki hdoăng, mơ’no têa mê châ rak krá lĕm ƀă châ xúa ton la ngiâ, tiô pôa Nguyễn Văn Danh, Kăn ƀô̆ ngăn’na tơmeăm khoăng hdoăng-mơ’no têa, cheăng tung Khu pơkâ ngăn tơdroăng mơ’no liăn mơjiâng pro tơmeăm khoăng kong pơlê Gia Lai tối tiah kố: Khu ki mơ’no liăn mơjiâng pro tơmeăm kô tơrŭm krá khât ƀă khu râ, kơvâ cheăng ƀă mâu tíu ki pơkuâ ngăn tơmeăm khoăng; đi đo hnê tối, mơhnhôk vâi krâ-nhŏng o rak vế xiâm têa, tí tăng ngăn mâu tơmeăm khoăng ki tro tơ’nhiê vâ ‘mâi rơnêu, rak ngăn mâu klŏng ki mơ’no têa, ôh tá lôi mâu klŏng têa tro tơhneăng, tơplŏng lo têa, rak ngăn mâu tíu ki meăn hdoăng têa i tơniăn vâ vâi krâ-nhŏng o châ xúa tơniăn lĕm.