Peăng xêi hâi lơ 20/9, pôa Đỗ Văn Chiến, Kăn xiâm hnê ngăn Vi ƀan Măt trâ̆n Tơnêi têa Việt Nam hiăng tơdah xo liăn ing Khu xiâm ngăn ‘na tơpui kâ, mâu kơ koan teăng mâ tơpui kâ ƀă khu mơdró kâ tung tơnêi têa ƀă kong têa ê gum ăm kuăn pơlê ki trâm hliăng tiâ, xahpá xua tơdjâk ing khía mơhot kân roh má 3 pro. Tiah mê, riân troh 17 chôu hâi lơ 20/9, Khu hnê mơhnhôk tŏng gum dêi tơnêi têa hiăng châ xo tâi tâng ai 1.628 rơtal liăn. Ing kơxô̆ liăn ki pơtroh gum kố, Khu hnê mơhnhôk tŏng gum tơnêi têa hiăng xing xoăng 1.035 rơtal liăn troh 26 kong pơlê, pơlê kong kân ki vâ ‘mâi rơnêu, mơnhông tơdroăng rêh ối, pêi cheăng kâ klêi kơ’nâi trâm xâu xía xua khia mơhot kân, têa lân luô. Xông tơpui a Leh tơdah xo kơxô̆ liăn mê, pôa Đỗ Văn Chiến, Kăn xiâm hnê ngăn Vi ƀan Măt trâ̆n Tơnêi têa Việt Nam hiăng mơhno tối tơdroăng ki ƀriê phoih tung tuăn mơno drêng ai tơdroăng tŏng gum ki ai pơxúa kân khât kố dêi mâu khu mơdró kâ, khu pơkuâ cheăng ƀă mơngế krê ki tŏng gum ăm kuăn pơlê hliăng tiâ, xahpá xua khía mơhot kân roh má 3 pro.

Pơtroh rơkong koh mơnê kân ‘nâng troh a Khu xiâm ngăn ‘na tơpui kâ dêi Sinuâ a Việt Nam. Kăn teăng mâ kong têa Siam a Việt Nam, mâu khu mơdró kâ dêi mơngế Việt Nam a kong têa Siam, Khu ngăn kuăn pơlê Việt Nam a kong têa Ukraina ƀă hên hĕng mâu kuăn pơlê Việt Nam ki dế rêh ối a kong têa ê, pôa Đỗ Văn Chiến tơkêa kô xúa kơxô̆ liăn ki mê tro tơdroăng vâ pơtroh ăm kuăn pơlê ki trâm xahpá, hliăng tiâ, pá puât klêi kơ’nâi tro khía mơhot yagi pro; xúa kơxô̆ liăn mê tro tơdroăng, châ tơƀrê, tối tơbleăng, tơdrăng khât, kal ai tơdroăng ki séa ngăn dêi kuăn pơlê ƀă pơlê pơla.