Rơtế ƀă lâp tơnêi têa, hneăng tơ’noăng mơgêi râ má pái phôh thong hơnăm 2024, tơkŭm po sap hâi lơ 26 – 29/6 a kong pơlê Dak Lak ai vâ chê 21.000 ngế hok tro veăng tơ’noăng a 33 tíu tơ’noăng ƀă lối 870 kơbong tơ’noăng a tâi tâng mâu tơring, pơlê kong krâm, pơlê kong kơdrâm. Lối 2.000 ngế kăn ƀô̆, thái cô ngăn tơ’noăng, ngế séa ngăn ƀă gum pêi pro tơdroăng a mâu tíu tơ’noăng. Troh nôkố, Dak Lak hiăng hbrâ tơkŭm po hneăng tơ’noăng tiô pơkâ pêi ƀă pơkâ dêi Khu xiâm pơkuâ hnê hriâm ƀă hnê mơjiâng tuăn ngôa rơkê, pơkâ troh môi hneăng tơ’noăng tơniăn, dâi lĕm, châ tơƀrê hên.

Tơdroăng hbrâ mơdât pơreăng, mơgrúa kong prâi, tơniăn tơmeăm kâ, gum rơnó tơ’noăng, tŏng gum hok tro, nhŏng o hok tro, xuân châ Khu hnê mơhno hneăng tơ’noăng mâu khu râ pêi pro ƀă ai troăng pêi ing rĕng tung tơrŭm pêi pro. Tơdroăng rak tơniăn gâk kring, tơniăn hneăng tơ’noăng châ tơmâng hên khât. Tiô Đăi tă Nguyễn Hữu Lương, kăn pơkuâ ƀơrô Gâk kring kal kí khu (PA03), Kŏng an kong pơlê Dak Lak, kơvâ kŏng an hiăng mơjiâng pơkâ pêi tơrŭm krá tơniăn ƀă mâu kơvâ hbrâ tung mâu troăng pêi tơniăn gâk kring, tơniăn ăm hneăng tơ’noăng.