Tơpui tơno ‘na mâu troăng tơmiât pêi rơkê vâ tŏng gum mâu kŏng ti pơxiâm tăng cheăng pêi ƀă tơdroăng pêi cheăng pơhlêh nếo tơmiât pêi rơkê a Việt Nam, Ngế pro xiâm hnê ngăn Chin phuh tối ăm ‘nâi, Việt Nam pêi pro tơdâng tơ’mô 5 khu troăng vâ kêi đeăng pơkâ pêi, troăng hơlâ tŏng kum, mơdêk pơhlêh nếo tơmiât pêi rơkê ƀă pơxiâm tăng cheăng pêi; pêi pro mâu tơdroăng ƀă tơdroăng tơkêa bro râ Tơnêi têa ‘na tŏng kum tơrŭm dê pó pơxiâm tăng cheăng pêi pơhlêh nếo tơmiât pêi rơkê, tŏng kum hok tro, sinh viên pơxiâm tăng cheăng pêi, tơdroăng tŏng kum khu tê mơdró pơhlêh xúa kŏng ngê̆, tơdroăng pơloăng mơnúa pơhlêh nếo tơmiêt pêi rơkê Việt Nam.

Pôa Phạm Minh Chính, Ngế pro xiâm hnê ngăn Chin phuh xuân tơpui tơno hên tơdroăng ki tơdjâk pơkâ mơnhông ƀă roh tơ’lêi ăm rơxông ối nếo Việt Nam tung mâu kơvâ nếo ô eăng môi tiah tơmeăm ki kuăn mơngế mơjiâng pro chiâng pêi cheăng rơkê môi tiah kuăn mơngế, kế ki chiâng hrik mơ’no hyôh, tơmeăm rak ‘măn tơmeăm kân; ‘na tơdroăng ki kơdroh lâp plâi tơnêi ‘na mâu tơdroăng ki ai tung lâp plâi tơnêi ki ê.