Hâi lơ 26/6, a Tíu tơkŭm po leh khĕn cho Đại lễ đường Nhân dân, pơlê kong xiâm Bắc Kinh, Sinuâ, tung rôh lăm pôu pêi dêi hnoăng cheăng veăng hôp a rôh hôp tiah hmâ mâu kăn pơkuâ djâ troăng ahdrối rôh má 15 dêi Rôh hôp Cheăng kâ lâp plâi tơnêi a Đại Liên ƀă pêi cheăng a Sinuâ, pôa Phạm Minh Chính, Ngế pro xiâm hnê ngăn Chin phuh tơpui tơno ƀă pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ.

A rôh tơpui tơno, péa ngế kăn xiâm pơkuâ hiăng môi tuăn pơtối pêi pro hơ’lêh ki hlê plĕng tơdjuôm khu râ kăn xiâm, malối cho Tối tơbleăng tơdjuôm Việt Nam – Sinuâ ‘na tơdroăng ki pơtối pêi pro trâu hơngế ƀă mơdêk tơrŭm cheăng ƀă kong têa tơrŭm tung la ngiâ tŭm têk, mơjiâng Pơlê pơla tối tơbleăng ăm dêi rơpó tơdroăng cheăng tung la ngiâ Việt Nam – Sinuâ ai pơxúa tiô túa pơkâ “6 lối”.

Pôa Phạm Minh Chính, Ngế pro xiâm hnê ngăn tơnêi têa pơkâ thế péa pâ tơrŭm tơƀrê mơjiâng mâu kế tơmeăm ki kân, djâ tơdroăng ki mơdêk ƀă tơƀrê ai pơxúa, krá tơniăn. Péa pâ xuân tơpui tơno ‘na mâu tơdroăng tung kong têa ê, tung kơpong ki péa rơtế vâ ‘nâi, môi tuăn rơtế séa ngăn ƀă tŏng kum tơxâng mâu tơdroăng ôh tá môi tuăn, rak vế hơniâp lĕm, tơniăn a têa  kơxĭ.