Kuô̆k hô̆i têk kŏng tơbleăng Pơkâ dêi Kuô̆k hô̆i ‘na tơrŭm khu kăn pơkuâ kơphô̆ ƀă tíu pơkâ troăng hơlâ tŏng kum, troăng hơlâ pơkâ xiâm mơjiâng Pơlê kong kân Đà Nẵng. Klêi kơ’nâi, 93% ngế kăn veăng têk kŏng môi tuăn (452/459) tơbleăng Pơkâ ‘na tơrŭm khu kăn pơkuâ kơphô̆ ƀă tíu pơkâ pro troăng tŏng gum xiâm mơjiâng Pơlê kong kân Đà Nẵng.

Ƀă tơdroăng pơkâ mơjiâng kơpong tê mơdró tơniăn krê, Vi ƀan pơkuâ Kuô̆k hô̆i hlo, tơdroăng pơkâ mơjiâng kơpong tê mơdró krê cho troăng pơkâ kân hiăng ai tŭm tơdroăng séa ngăn ‘na kal kí, séa ngăn ‘na luât; tâng pêi pro ƀlêi chiâng kô pro ivá mơdêk mơnhông cheăng kâ rêh ối pơlê pơla dêi Pơlê kong kân Đà Nẵng ƀă dêi tá kơpong.

Hdrối mê, ƀă ki hên kơxô̆ phĭu vâ dêi mâu kăn cho (453/459), 93,21%; Kuô̆k hô̆i hiăng tơbleăng Pơkâ ‘na tíu pro ‘mot tơ’nôm mâu troăng hơlâ tŏng kum xiâm mơjiâng kong pơlê Nghệ An.