A Leh tơbâ, pôa Tô Lâm, Kăn xiâm hnê ngăn tơnêi têa teăng mâ Đảng, Tơnêi têa diâp Mê dai Chiến công ối má Péa ăm khu lêng Kih thuât hnoăng cheăng, tơmâng xo mâu hnoăng cheăng ƀă ivá veăng kum kơhnâ rơkê dêi tíu pêi cheăng. Kăn xiâm hnê ngăn tơnêi têa tối nhên, Đảng, Tơnêi têa, Đảng ủy Kŏng an Tơnêi têa ƀă Khu xiâm ngăn Kŏng an đi đo tơmâng xo, mơnhên tối khât tơdroăng ki pleăng kân kĭn ƀă mâu tơdroăng pêi pro ƀlêi chiâng, hnoăng cheăng ki rơkê dêi khu lêng Kih thuât pêi cheăng Kŏng an Nhân yân tung plâ 70 hơnăm mơjiâng, tơplâ ƀă mơnhông.

Kăn xiâm hnê ngăn tơnêi têa loi khu lêng Kih thuât pêi hnoăng cheăng Kŏng an Nhân yân pơtối tơrŭm, môi tuăn, tuăn ngoâ ƀĕng ƀeăn, rơkê, tơkâ luâ mâu tơdroăng pá puât, pơloăng mơnúa mơjiâng tơ’nôm hên hnoăng cheăng ƀlêi chiâng ki nếo, pêi klêi rơkê mâu hnoăng cheăng châ pơcháu, tơxâng, malối loi khât, hiâm mơno tơdrăng dêi Đảng, Tơnêi têa, kuăn pơlê, veăng kum pêi pro ƀlêi chiâng hnoăng cheăng mơjiâng ƀă rak vế Tơnêi têa Việt Nam xah hô̆i chuh ngiah.