Koh  hâk Khu kăn cheăng dêi IMF lăm pôu ƀă pêi cheăng a Việt Nam, pôa Phạm Minh Chính - Ngế pro xiâm hnê ngăn tơnêi têa loi khât ing mâu rôh pêi cheăng ƀă mâu kơ koan, khu tơrŭm cheăng tơdjâk troh dêi Việt Nam, Khu kăn hiăng ai kơtâ um cheăng kâ - rêh ối dêi Việt Nam hơnăm 2023 ƀă mâu khế apoăng hơnăm 2024.

Ngế pơkuâ Khu hnê ngăn Tơdroăng má 4 dêi IMF pâ thế Việt Nam kal pơtối pê klêi luât pơkâ, pro xiâm tê mơdró tơdrăng lĕm; mơdêk hnoăng cheăng rak ngăn, hbrâ mơdât kâ kơluâ; po troăng tơ’mot ăm khu ‘no liăn cheăng, malối cho tung kơvâ  mơjiâng tơmeăm khoăng on tơhrik  ‘mâi pro...

Mơnê mâu tơdroăng kơdôu mơ-eăm dêi IMF ‘măn chôu ăm Việt Nam, malối cho hnê tối luât pơkâ tŏng kum, pôa Phạm Minh Chính - Ngế pro xiâm hnê ngăn tơnêi têa pơkâ thế IMF pơtối hnê tối, po ngăn đi đo mâu tơdroăng tối ăm ‘nâi, tơdroăng tối hdrối ‘na tơngah cheăng kâ tung lâp plâi tơnêi, tơdjâk troh mâu tơdroăng cheăng kâ tung kơpong ƀă hnê tối mâu luât pơkuâ ki kân ăm Việt Nam; mơnhông tơrŭm cheăng, kum dêi rơpó ‘na kih thuât ƀă hnê mâu tơdroăng cheăng rak ngăn cheăng kâ, rak ngăn liăn ngân, rak ngăn liăn po rơdâ tơrŭm cheăng, hnê mâu ngế pêi cheăng ăm Việt Nam vâ mơdêk ivá tơrŭm cheăng lâp plâi tơnêi.