Tung toăng hngêi “Tơrŭm pơla khu lêng ƀă kuăn pơlê” nếo châ bro diâp, pôa Y Huê Êban a ƀuôn Niêng 1, cheăm Ea Ñuôl, tơring Ƀuôn Đôn phiu ro tối, ing hâi ki ai hngêi nếo lĕm, rơpŏng ôh tá tôu tuăn xếo troh tơdroăng ki tôu téa a rôh tôu mơdrăng, tro xi kơchoh a rơnó mê hngê. Ivá dêi pôa xuân hiăng hlo chía hơ’lêh, pê châ hên tơdroăng cheăng, rơpŏng châ pêi lo liăn tơ’nôm. Pôa mơnê mâu vâi ngoh mố đô̆i hiăng bro hngêi diâp ăm rơpŏng pôa:

“Hdrối nah, hngêi á ối kố kong mê gá xi kơchoh, kong tôu mê gá tôu ó khât, nôkố khu pơkuâ ngăn cheăm tơmâng ngăn tŏng kum bro ăm hngêi lĕm mê á ro khât. Á kô mơ-eăm pêi cheăng kâ vâ mơnhông, rơtế ƀă vâi krâ nhŏng o tung pơlê veăng kum rak vế tơniăn gâk kring tơniăn”.

Tiô pôa Y Kim Êban, Ngế ki pơkuâ ƀuôn Niêng 1, mố đô̆i ki pôa Y Huê tối troh mê cho kăn ƀô̆, lêng tíu cheăng K864 (Cục Kuân khí, Khu xiâm Kih thuât). Kố xuân cho tíu pêi cheăng tơrŭm bro nhŏng o ƀă ƀuôn Niêng 1 ing hên hơnăm hdrối. Tơdroăng ki tŏng kum bro hngêi ăm rơpŏng kơtiê hiăng tơ’nôm ivá vâ mâu rơpŏng mơ-eăm.

“Tơdroăng tơrŭm pơla khu lêng ƀă kuăn pơlê hlo tơrŭm khât, troh pôu kơ-êng hnê tối mâu tơdroăng ki vâi rơkê plĕng ăm vâi krâ nhŏng o mơnhông mơdêk cheăng kâ. Pơlê ngin kố phiu ro khât. Malối cho mâu rơpŏng kơtiê vâi mơ-eăm pêi cheăng kâ vâ xo ah hmôi mâu rơpŏng kơtiê kố rế hía rế kơdroh”.

Cho tíu tơrŭm bro nhŏng o ƀă ƀuôn Mriu, cheăm Čư̆ Huê, tơring Ea Kar, kong pơlê Dak Lak, 20 hơnăm hdrối, kŏng ti On tơhrik Dak Lak hiăng kum ôh tá iâ tung hơ’lêh ngiâ méa thôn pơlê akố. Ing môi to thôn kơklêa, athế tŏng kum phái rêm rơnó báu tá hâi teăm tum, mê nôkố, kơxô̆ rơpŏng kơtiê chu ối 10%. Hên rơpŏng tung thôn hiăng châ bro hngêi lĕm, châ roê rơxế kong nong, kơmăi tôh tơmeăm pêt. Tiô pôa Trần Văn Thuận, Kăn pơkuâ Kŏng ti On tơhrik Dak Lak, ngăn tung túa pơkâ tơrŭm bro nhŏng o rêm hơnăm, Đảng ủy kŏng ti hiăng xoăng hnoăng cheăng ăm rêm râ, kơvâ cheăng, chi ƀô̆ tơrŭm ƀă mâu tíu ki tơrŭm bro nhŏng o vâ tơbleăng pêi pro tơƀrê tơdroăng kố.

“Tiô tơdroăng tơrŭm bro nhŏng o mê tíu pêi cheăng kố hiăng mơ’no mâu túa pơkâ pêi cheăng rêm hơnăm tŏng kum tơdroăng rêh ốii pơlê pơla ƀă tơmâng ngăn troh mâu rơpŏng ki ai hnoăng, rơpŏng pá puât vâ kum mâu rơpŏng kố mơnhông mơdêk cheăng kâ. Ƀă ƀuôn Mriu mê mâu tơdroăng pá puât nôkố tíu pê cheăng hiăng ‘nâi nhên ƀă pơkâ mơ’no mâu tơdroăng tŏng kum ki kal ăm kuăn pơlê xuân môi tiah tơdroăng mơjiâng thôn hlê plĕng”.

Pêi pro tiô troăng hơlâ pơkâ dêi Khu pơkuâ hnê ngăn cheăng Đảng ‘na hnoăng cheăng tơrŭm cheăng bro nhŏng o ƀă mâu thôn, pơlê hdroâng kuăn ngo ki iâ mơngế, troh nôkố, Dak Lak ai vâ chê 200 kơ koan, tíu pêi cheăng, khu mơdró kâ râ kong pơlê tơrŭm bro nhŏng o ƀă mâu thôn pơlê. Pôa Nguyễn Đình Trung, ngế cheăng tung tíu xiâm Đảng, Kăn pơkuâ hnê ngăn Đảng kong pơlê Dak Lak ăm ‘nâi, ƀă tơdroăng mơ-eăm tŏng gum, pêi pro ai pơxúa ing mâu tíu pêi cheăng tơrŭm bro nhŏng o, tơdroăng rêh ối, pêi lo liăn ngân ƀă hiâm mơno dêi hdroâng kuăn ngo châ tơrŭm bro nhŏng o hiăng hơ’lêh hên khât.

Tung la ngiâ ah, Khu pơkuâ hnê ngăn Đảng kong pơlê Dak Lak kô pơtối mơdêk rơdêi pêi pro hnoăng cheăng tơrŭm bro nhŏng o ƀă mâu thôn pơlê hdroâng kuăn ngo vâ kum xut tah hrâ mơnguâ kơtiê xơpá, ‘mâi mơnhông khu tơrŭm hdroâng kuăn ngo, mơ-eăm mơjiâng Dak Lak rế hía rế kro lĕm – rơkê – lĕm tro.

“Mâu kơ koan tíu pêi cheăng tơrŭm bro nhŏng o ƀă mâu thôn pơlê chiâng vâ tối pêi pro hnoăng cheăng, châ mâu tơdroăng kố ƀă châ tơdroăng ki pơkâ thế, tơdroăng pơkâ mơ’no. Tơdroăng rêh ối dêi kuăn pơlê a kơpong hngế hngo hiăng hơ’lêh hên ƀă tơdroăng ki tơdjuôm ivá, tơdroăng tơrŭm pơla mâu hdroâng kuăn ngo rơtế ƀă dêi rơpó mơjiâng kong pơlê Dak Lak kro lĕm”.

Hlo tiah kố, mâu tơdroăng ki pêi pro ai pơxúa tro ƀă tơdroăng ki ai khât a thôn pơlê, hnoăng cheăng tơrŭm bro nhŏng o pơla mâu thôn pơlê a Dak Lak hiăng pro pơxúa tơƀrê khât, veăng gum kal khât tung tơdroăng mơnhông cheăng kâ rêh ối pơlê pơla, mơjiâng khu pơkuâ tơdroăng kal kí a thôn pơlê, rak vế tơniăn gak kring kal kí, tơniăn tung lâp pơlê pơla ƀă tơrŭm krá tơniăn tơ’nôm tơrŭm pơla mâu hdroâng kuăn ngo.