Rơnó pơtê hriâm hơnăm kố, hmâ ing kơxo hâi môi troh kơxo hâi pơtăm tung măng tĭng, 40 ngế ki ai tơdroăng rêh ối pá puât a pơlê Trol Đeng, pơlê kân Čư̆ Ty, tơring Đức Cơ mê vâi hâk vâ troh a lâm hriâm pơtân a kĭng hngêi trung tung pơlê. Maluâ mâu vâi o kŭn 6 hơnăm lơ mâu vâi ngoh nâ ki 10 hơnăm, xuân pơrá hâk vâ ƀă mâu hlá mơéa, loăng chêh ƀă mâu chôu hriâm tơvât ƀă mâu chôu ki xah hêi. O Rơ Mah H’Xiêu, 7 hơnăm, pơlê Trol Đeng, pơlê kân Čư̆ Ty, tơring Đức Cơ, tối.

“Á hriâm lâm 2, lăm hriâm châ hriâm châ xah mâu tơdroăng xah hêi, cô hnê á pơchuât ƀai, á lăm hriâm a rơnó pơtê hriâm kố hlo ro khât”.

Ƀă o H’Nhi Ê Ban, 10 hơnăm hlo khên tơnôu tâ drêng châ veăng hriâm a lâm hriâm.

“Hơnăm kố á to lâm 5, lăm hriâm hlo ro khât, châ hmâng cô hnê ƀai, á hâk vâ khât hriâm a rơnó pơtê hriâm môi tiah kố”

Cô yăo Nông Ngọc Huân, (cô Hngêi trung râ má pái Lê Hoàn, tơring Đức Cơ) cho 1 tung mâu cô yăo ki pleăng dêi hnoăng hnê a rơnó pơtê hriâm ăm vâi hdrêng tung pơlê Trol Đeng. Akố, cô hnê ăm mâu vâi o akố ing chêh chư, hriâm pơchuât troh pro ƀai toán ki tơ’lêi. Cô yăo Nông Ngọc Huân tối, á hlo phiu ro drêng mâu vâi o tơxĭn a kơpong pá puât kố rêm hâi rế rơkê ing mâu rôh hriâm.

“Mâu vâi o mot lâm 1 mâu cô yăo hnê ăm mâu vâi o pơchuât ƀă chêh, tơdrêng amê hlối hnê tơ’nôm ăm mâu vâi o mâu tơdroăng ki xúa tung rêh ối. Mâu vâi o ki kân tâ mê hlo ivá hriâm pơchuât chêh gá rơkê tâ, la vâ mâu vâi o pôi tá kơxiâp kơmêi ƀă khên tơnôu mê mâu cô yăo kô ai ƀai tâp krê ăm vâi, ai mâu tơdroăng cheăng vâ mâu vâi o chiâng vâ hriâm tơ’nôm tơdroăng rêh ối. Hlo mâu o chía rơkê tâ hên, ro tâ, veăng tung mâu tơdroăng cheăng kơhnâ tơƀrê tâ”.

Tiô cô yăo Lê Thị Xuân, đoàn viên Đoàn Droh rơtăm pơlê kân Čư̆ Ty, tơring Đức Cơ, maluâ tơdroăng rêh ối, ối trâm pá puât, hriâm a gong tôu mê khía la mâu vâi o xuân ối kơhnâ troh a lâm. Lâm hriâm rơnó pơtê hriâm tê kơtê a pơlê Trol Đeng ôh ti xê djâ vế túa ki rơkê plĕng, tơdroăng rêh ối ăm mâu vâi o hok tro mê ối kum mâu vâi o ki pleăng dêi hnoăng ai tơ’nôm tơdroăng ki châ mơnúa ngăn, châ kum ăm pơlê pơla ƀă ôh tá la lâi mơnhông tơƀrê.

“Tung pơla hnê tơ’nôm akố mê á hlo mâu vâi o kơhnâ khât, maluâ kong mê, khía la mâu vâi o vâi xuân ối troh alâm tŭm, lăm hriâm ai drêng ‘nâ ối athế djâ dêi ó tiô. Mâu vâi pá puât hên tơdroăng la hlo hiâm mơno ki rơhêng vâ hriâm dêi mâu vâi o gá mơeăm khât. Á púi vâ tiah kố tơdroăng kố kô pơtối châ rak vế a mâu rơnó hriâm a hơnăm kơ’nâi ah nếo”.

Nâ Lê Thị Thu, Kăn pơkuâ Đoàn Droh rơtăm pơlê kân Čư̆ Ty ăm ‘nâi, lâm hriâm rơnó pơtê hriâm tơkŭm po a pơlê Trol Đeng cho lâm hnê ki mơnúa ngăn dêi mâu vâi pú hơnăm ối nếo pơlê kân tung rơnó pơtê hriâm kố. Ngin kô mơeăm pơtối rak vế tơdroăng ki hnê kố a mâu hơnăm mê hía ah nếo vâ kum vâi o kơpong pá puât ai rôh châ hriâm tâp, xah hêi ƀă mơnhông tŭm têk.

“Mâu đoàn viên mơeăm hên vâ mơhnhôk mâu vâi o troh a lâm hbrâ rơnáu mâu tơdroăng ki rơkê plĕng, mâu tơdroăng rêh ối ki kal tung rêh ối. Đoàn droh rơtăm xuân mơhnhôk mâu knhu ki ai hiâm mơno hơ-ui vâ mâu vâi o troh chôu lo pơtê xah rêm ngế o châ ăm 1 kơhôp têa tôu ro, tŏng kum hlá mơéa hriâm hlá mơéa chêh, hmân ếo ki ton ƀă mâu kế xúa tung hriâm tâp bro ăm tơdroăng ki hriâm tâp ƀă xah hêi chiâng hơniâp lĕm tâ ăm mâu vâi o”.

Hơnăm hriâm nếo hiăng vâ troh a chê, ai mâu cheăm tơring ki ‘na ăm hdrêng lăm hriâm hdrối 2 măng tĭng vâ hmâ, hâk vâ hriâm. U ối cho mâu hngêi trung ki ê kô ăm hok tro tơkŭm troh a lâm apoăng măng tĭng la ngiâ.

Môi rơnó pơtê hriâm ƀă mâu lâm hriâm ki ôh tá ai klâi la ai hên tơdroăng ki pâ nhuô̆m, mâu vâi phô̆m vâ xông kân kơpong pá puât môi tiah châ tơdah tơ’nôm ivá ƀă tơdroăng ki tơngah vâ mơeăm. Ƀă mâu vâi pú hơnăm ối nếo ki pleăng dêi hnoăng cheăng, maluâ bu cho mâu rôh hnê ki kŭn la hiăng djâ vế hên tơdroăng ƀă rơkê hên tơdroăng tâ drêng hlê nhên tâ ‘na tơdroăng rêh ối kuăn pơlê hdroâng kuăn ngo kơpong hngế hngo.