Bă lối 10 rơtal liăn ing kơxô̆ liăn Tơdroăng pơkâ tơnêi têa mơnhông cheăng kâ rêh ối pơlê pơla kơpong kuăn pơlê hdroâng kuăn ngo, cheăm kơpong 3, cho kơpong ki malối xahpá,  Ea Hiu, tơring Krông Pač, kong pơlê Dak Lak hiăng ok ƀê tong a 9 to triăng prôk tung thôn pơlê ƀă tâi tâng ki xŏn vâ chê 5,5km. Tơdroăng ki ‘mâi, po rơdâ mâu troăng ôh ti xê kum tơniăn tâ tơdroăng ki prôk lăm, pơto chơ tơmeăm pêi lo ing chiâk deăng mê ối veăng kum tơdjêp troăng prôk pơla mâu thôn, pơlê. Jâ H’Ninh Êban, kuăn pơlê a cheăm Ea Hiu ăm ‘nâi:

“Hdrối nah, troăng kố gá trâp hliâk, ai troăng prôk kố á ro khât, kuăn ‘nĕng lăm hriâm, prôk ăm tơ’lêi hlâu tâ ƀă mot tung rơnó poê báu kố kuăn pơlê chơ báu lơ chơ kế tơmeăm pêi lo ing chiâk deăng tơ’lêi hlâu tâ”.

Troăng prôk ing troăng kân kơxô̆ 27 troh long Ƀuôn Biếp, cheăm Yang Tao, tơring Lak, kong pơlê Dak Lak xuân châ ‘no liăn ing kơxô̆ liăn dêi Tơdroăng pơkâ dêi tơnêi têa mơnhông cheăng kâ rêh ối kơpong hdroâng kuăn. Troăng prôk kố ai ki xŏn vâ chê 3km mot tung mâu xí Bìm Bịp, môi tung mâu tíu ki lĕm châ vâi ô eăng dêi tơring Lak. Troăng prok kố châ bro klêi a hơnăm 2023. Pôa Y Mra Liêng, kuăn pơlê tung cheăm kố ăm ‘nâi, ing rôh troăng prôk kố bro klêi mâu rơxế prôk tơ’lêi hlâu hlối châ mot tung xí, tơ’lêi prôk lăm, kơxô̆ tơmối troh a xí tâk hên tâ tâng vâ pơchông ƀă mâu hơnăm hdrối, veăng gum mơnhông cheăng kâ dêi cheăm tơring.

“Ai troăng prôk cho tơdroăng tơniăn hlâu. Pơlê cheăm dêi ngin hiăng pơhlêh lĕm môi tiah kố, á xuân phiu ro khât”.

Ing hơnăm 2023 troh nôkố, ƀă kơxô̆ liăn dêi Tơdroăng pơkâ tơnêi têa mơnhông cheăng kâ rêh ối pơlê pơla kơpong hdroâng kuăn ngo, tơring Lak, kong pơlê Dak Lak hiăng bro ƀă rơnêu 37 to troăng prôk ki kal, tơdroăng rêh ối tung kơpong hdroâng kuăn ngo, ƀă tâi tâng kơxô̆ liăn ‘no lối 75 rơtal liăn.

Mâu troăng prôk hiăng rế hía rế châ chiâng hngêi trăng tơdâng tơ’mô, pro tơ’lêi hlâu vâ châ ki pơxúa dêi cheăm tơring tung mơnhông pêi chiâk deăng ƀă ôm hyô. Pôa Nguyễn Anh Tú, Kăn phŏ hnê ngăn Vi ƀan tơring Lak, kong pơlê Dak Lak tối nhên:

“Troăng prôk tơ’lêi hlâu veăng gum kế tơmeăm châ pơto chơ tơniăn hlâu. Má péa, cho kơdroh iâ tơdroăng ki mung vâi chơ tơmeăm. Tiah mê, tơƀrê ing ‘no liăn pro troăng prôk pro pơxúa ăm tơdroăng pêi  lo liăn. ‘Na tơnêi tơníu krúa lĕm, phuâng tơniăn tâ”.

Tơdroăng pơkâ tơnêi têa mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo hiăng veăng gum mơdêk ki rơkê plĕng tung tơdroăng rêh ối kơpong hdroâng kuăn ngo ƀă peăng kong ngo kong pơlê Dak Lak. Hơnăm 2023, rơpŏng kơtiê hdroâng kuăn kơdroh ing 26,7% chu ối 19,7%, kơdroh 7% tâng vâ pơchông ƀă hơnăm 2021.

Malối, mâu hngêi trăng troăng prôk châ ‘no liăn pro a kơpong hdroâng kuăn ngo vâ kuăn pơlê mơnhông cheăng kâ rêh ối, veăng kum pêi mâu tơdroăng pơkâ kơdroh kơtiê tung hdroâng kuăn ngo ing 3% troh 4% tung hơnăm.

Apoăng khế 8 pơla hdrối kố nah, a pơlê kong kơdrâm Ƀuôn Ma Thuột, kong pơlê Dak Lak, Khu hnê mơhno cheăng Tơnêi têa mâu tơdroăng pơkâ tơnêi têa tơkŭm po Rôh hôp ‘no tơdrêng ing troăng hyôh internet bă mâu kong pơlê kơpong Tây Nguyên ‘na tơdroăng tơbleăng pêi pro mâu tơdroăng pơkâ tơnêi têa, tối nhên: Liăn Tơnêi têa hơnăm 2024 gum pêi pro 3 Tơdroăng pơkâ tơnêi têa (Tơdroăng mơnhông cheăng kâ rêh ối pơlê pơla kơpong hdroâng kuăn ngo ƀă peăng kong; Tơdroăng kơdroh kơtiê krá ton ƀă Tơdroăng mơjiâng thôn pơlê nếo) kơpong Tây Nguyên cho lối 5.500 rơtal liăn.

Troh nôkố, kơpong Tây Nguyên ai dâng 373 to cheăm ai pơkâ mơnhên pêi klêi thôn pơlê nếo. Pôa Trần Lưu Quang, Ngế pro xiâm phŏ hnê ngăn tơnêi têa tối nhên, vâ tơbleăng pêi tơƀrê mâu Tơdroăng pơkâ tơnêi têa, mâu kong pơlê athế ngăn mê cho môi tơdroăng pêi ki rơkê tro, gum ăm kuăn pơlê mâu kơpong pá puât ai tơdroăng rêh ối tơniăn lĕm tâ mê athế pêi tâi hnoăng cheăng, kơhnâ, kơtăng tâ nếo tung la ngiâ.

Ngế pro xiâm phŏ hnê ngăn tơnêi têa pơkâ thế mâu kong pơlê athế hriâm tâp ing dêi rơpó, kong pơlê ki lâi tá hâi cheăng pê mê athế hriâp tâp ing mâu kong pơlê ki pêi rơkê vâ rơtế ƀă dêi rơpó pêi ƀlêi chiâng hnoăng châ pơcháu:

“Pơkâ thế mâu kăn pêi pê̆ pro tơdrêng hlối mâu tơdroăng ki chiâng vâ pêi. Kơxô̆ liăn kố ƀă 5 to kong pơlê kơpong Tây Nguyên mơni kô ôh tá hên ƀă kơxô̆ liăn ‘no pêi cheăng tơdjuôm, lagá kal khât xua gá châ tŏng gum tơrêm to pơlê cheăm. Pó tối 1 rơpâu tơdroăng pá, tơmâng xo tâi, la peăng pó athế kơhnâ, mâu tơdroăng pin ai hlâu tâi mê pêi ôh tá klêi tơdroăng mê hnloăng cheăng dêi kố? Tung khế 9 ah pó ôh tá pêi bu ối túa ki séa ngăn dêi tơná ƀă tâng hneăng cheăng klêi kơ’nâi xoăng liăn ăm mâu kong pơlê tiô mơnhên tối ki rơkê tơbleăng 3 tơdroăng kố dêi hneăng cheăng kố pin kô pơcháu hên kế tơmeăm tâ ăm mâu ngế ki ‘nâi pêi ƀă pêi rơkê”.