Mơdoh chôu pơtê hâi dế, ngăn a kơdrum pêt kơchâi ƀă po gô̆m dêi mâu xiâm trŏng ‘nhŭng plâi hên a grut vâ pơcháu ăm mâu ki rôe tro hâi, đảng viên Ya Dũng, krâ pơlê Labouye A, cheăm Lạc Xuân, tơring Đơn Dương, kong pơlê Lâm Đồng tối, to lâi hâi kố ngế ki lâi xuân tơvâ tơdroăng cheăng, a thế lăm a kơdrum a kơ hâi dế vâ troh kơxê ối tơkŭm po lâm hôp thôn tơpui tơno ‘na tơdroăng mơjiâng thôn pơlê cheăng kâ rêh ối tiô nếo ki mơnhông tơƀrê.

Đảng viên Ya Dũng ăm ‘nâi, xua hlo tơdroăng pêt kơchâi prá tiô troăng ki hmâ ing ton nah dêi rơpŏng hngêi ƀă nhŏng o tung pơlê ôh tá kâi tơƀrê, ôh pơxúa hên, kơxô̆ liăn pêi lo ôh tá hên mê ngoh pơkâ pơhlêh pêt kơchâi vâ tê tiô troăng pê cheăng xúa kơmăi ki dâi lĕm. Kơnôm ing mê, 4 sao tơnêi pêt kơchâi rơpê tŭm túa dêi rơpŏng hngêi hiăng ‘no tơ’nômkơxô̆ liăn ki pêi lo, riân rêm rơnó châ xo dêi rơkâ lối 100 rơtuh liăn. Tiô pôa Ya Dũng, ing tơdroăng pêi cheăng ki tơƀrê mê rơpŏng hngêi nếo tối ăm mâu kuăn pơlê ki ê ƀă vâi krâ nhŏng o nếo loi.

“Á mơ-eăm hriâm ing hên tíu, ôh tá xê to a kố mê ối lăm troh a hên cheăm, tơring ki ê. Hriâm ngăn vâi pêi cheăng ti lâi ‘na túa pêt hdrê kơchâi ki kố, hdrê ki tá. Ƀă cho mơngế cheăng tung Hô̆i đong mê thế  mơ-eăm kơ êng, tăng ‘nâi plêĕng hriâm túa pêi cheăng ki nếo, xúa hdrê ki nếo mê nôkố a dế pêi cheăng tiô túa ki nếo. Xua kuăn pơlê vâ rơtế ƀă dêi rơpó mơnhông dêi pơlê cheăm rế xông tơƀrê’’.

Pơlê Labouye A, cheăm Lạc Xuân, tơring Đơn Dương, kong pơlê Lâm Đồng ai lối 130 rơpŏng, tung mê ai lối 70% cho kuăn ngo K’Ho. Ing túa pêi cheăng ki tơƀrê dêi pôa Ya Dũng, kuăn pơlê ki ối tung pơlê hiăng hriâm ƀă pêi pro ƀối. Troh nôkố, 100% tơnêi pêt tung pơlê xuân hiăng châ pơ’lêh pêt kơchâi, plâi, pôm tŭm túa, Kơxô̆ liăn pêi lo hiăng tâk, ai hên rơpŏng hiăng hluăn kơtiê ƀă mơnhông dêi rơpŏng hngêi chiâng kro mơdrŏng tơdroăng rêh ối hiăng pơ’lêh tơ ê.

Pôa Ya Dũng ăm ‘nâi, troh nôkố, tơdroăng tơchĕng tơmiât túa pêi cheăng dêi kuăn pơlê tung pơlê Labouye A hiăng tơƀrê hên tâng vâ pơchông ƀă hdrối nah. Kuăn pơlê hiăng hlê pêi cheăng tiô khoa hok kih thuât, tơbleăng pêi rơkê, pêi lo hên tơmeăm ki lĕm krúa. Achê kố, Ya Dũng hnê kuăn pơlê pêi cheăng tiô inâi chêh vâ rôe tơmeăm, tơrŭm pơla khu pêi pêt ƀă khu mơdró, Khu pêi cheăng tơrŭm vâ rak tơniăn ‘na tơdroăng tê rôe kơchâi plâi pôm.

“Krê tơná á, la ngiâ kô ah á kô tăng ‘nâi plĕng ƀă veăng pêi cheăng tung khu pêi cheăng tơrŭm vâ tơniăn drêng tê dêi tơmeăm pêi lo, klêi mê mơhnhôk tơ’nôm hên rơpŏng veăng pêi cheăng tơrŭm môi taih á. Ai khu pêi cheăng tơrŭm, ai tơdroăng tơrŭm pơla pêi pêt ƀă tê rôe mê rêm ngế kô rơtế ƀă dêi rơpó mơnhông tơniăn tâ’’.

Tiô đảng viên Cruyang Cơi Long, kong pơlê Lâm Đồng, kăn phŏ hnê ngăn Đảng ủy cheăm Lạc Xuân, tơring Đơn Dương, kong pơlê Lâm Đồng. Ôh tá xê to djâ troăng ahdrối tung pêi cheăng kâ, Ya Dũng ối cho ngế kuăn ki vâi krâ nhóng o loi nhoăm ƀă đi đo djâ troăng ahdrối tung tơdroăng hnê mơhnhôk kuăn pơlê mơ-eăm pêi cheăng, malối mâu tơdroăng mơhnhôk gum dêi rơpó vâ kơdroh kơklêa xăm kơtiê, tơrŭm ivá ƀă dêi rơpó mơjiâng thôn pơlê cheăng kâ rêh ối tiô túa nếo.

“Á hlo tiah kố, pôa Ya Dũng cho môi đảng viên ki djâ troăng ahdrối, đi đo prôk hdrối tung pêi pro ƀă mơhnhôk kuăn pơlê pêi mâu tơdroăng cheăng a thôn pơlê. Malối, Ya Dũng ‘nâi kơdôu mơ-eăm tăng ‘nâi plĕng hriâm ƀă xúa kong ngế ki nếo tung pêi chiâk, klêi mê, ối hnê mơhnhôk vâi krâ nhŏng o tung pơlê pêi ƀôi ƀă kuăn pơlê pêi hlo tơƀrê hên, veăng rơtế ƀă kong pơlê mơjiâng dêi pơlê tơná rế xông tơƀrê‘’.

Ƀă hnoăng cheăng ki hiăng châ pêi pro ai pơxúa, mâu hơnăm hdrối, pôa Ya Dũng châ xo hên ƀâng kơdeăn khĕn dêi Đảng ƀô̆, mâu kăn tơring, kong pơlê ƀă xuân hiăng châ xo ƀâng  khĕn kơdeăn dêi Khu hnê mơhno cheăng Tây Nguyên xua hiăng ai hên hnoăng tung mơjiâng thôn pơlê rêh ối cheăng kâ tiô túa nếo, mơjiâng tôh kơphô̆ krá rơdêi.