Klêi kơ’nâi lối 2 hơnăm tơbleăng Pơkâ 749 dêi Ngế pro xiâm hnê ngăn Chin phuh, troh nôkố lối tơdế hồ sơ râ cheăm dêi kong pơlê Kon Tum hiăng châ chêh bro klêi ing măng, châ kơlo pơkâ mơ’no troh hơnăm 2025. Pakĭng mê, lối 16.800 ha tơnêi pêt hdrê loăng pêt, 142 ƀăng tíu ki pêt tơmeăm xúa mâu tơdroăng ki rơkê plĕng khoa hok ƀă kong ngê̆; lối 116.600 rơpŏng pêi chiâk deăng hiăng châ tê mâu tơmeăm ing tê mơdró điê̆n tưh; túa thôn 3, cheăm Tân Lập, tơring Kon Rẫy rak vế tŭm tơdroăng thôn rơkê ƀă hên ki ê.

Laga, tiô pôa Đặng Trần Huân, kăn phŏ pơkuâ Khu ngăn Chiâk deăng ƀă Mơnhông thôn pơlê kong pơlê Kon Tum, kong pơlê dế ối trâm hên pơloăng mơnúa drêng pêi pro hơ’lêh kơxô̆ tung mơjiâng thôn pơlê nếo:

“Tơdroăng ki hlê plĕng ‘na hơ’lêh kơxô̆ tung mơjiâng thôn pơlê nếo cho ôh tá tơ’mô. Tơdroăng ki hlê plĕng dêi kong chưk pêi pro hnoăng cheăng hơ’lêh kơxô̆ ối iâ. Tơmeăm khoăng hngêi trăng kong ngê̆ thong tin a mâu cheăm ki ‘nâ tá hâi pêi pro châ tơdroăng púi vâ ƀă hnoăng cheăng hơ’lêh kơxô̆”.

Ƀă 68% pơ’leăng mâ mơngế dêi kong pơlê rêh ối a thôn pơlê ƀă 74% ngế pêi cheăng tung kơvâ pêi chiâk deăng pêt kong, kong pơlê Kon Tum mơnhên hơ’lêh kơxô̆ cho troăng ki kal vâ mơnhông pêi chiâk deăng, thôn pơlê tiô troăng rơkê nôkố kum kuăn pơlê pêi chiâk ƀă kơxô̆ liăn hrê iâ má môi la châ hên ki pơxúa.

Tiô pôa Đặng Thanh Long - Kăn hnê ngăn Khu tơrŭm mâu Hô̆i đong Khoa hok ƀă Kih thuât kong pơlê Kon Tum, xua tơdroăng cheăng kâ rêh ối pơlê pơla ối xơpá, tơdroăng hơ’lêh kơxô̆ a kơvâ pêi chiâk deăng ƀă kơpong thôn pơlê dêi kong pơlê hdrối tâ kal tơkâ luâ mâu tơdroăng ki pá puât, mê cho kơmăi kơmok ối iâ, mâu tơdroăng cheăng ki pêt tơmeăm, xuân ối pêi tiô kơ tơdroăng ki rơkê plĕng dêi kuăn pơlê ƀă hên ki ê.

Tối troh troăng hơlâ mơdêk hơ’lêh kơxô̆ tung pêi chiâk deăng tơmiât troh mơnhông thôn pơlê rơkê, pôa Đặng Thanh Long, ăm ‘nâi:

“Hdrối tâ mê cho ‘na hnoăng cheăng tối tơbleăng vâ hlo nhên tíu, hnoăng cheăng, ki kal ƀă ki xơpá dêi hơ’lêh kơxô̆ tung mơnhông cheăng kâ pêi chiâk deăng kố cho môi troăng prôk ki kal. Mơdêk ki rơkê liăn ngân tá mâu khu pú hên mơjiâng pro, mê cho mâu rơpŏng kuăn pơlê pêi chiâk, tôh pêi cheăng tơrŭm, khu pêi cheăng tơrŭm, khu mơdró kâ ƀă tơná mâu kăn ƀô̆ mâu ngế ki veăng tung pơla pêi pro hơ’lêh kơxô̆ tung pêi chiâk deăng. Mơjiâng tíu, ivá pơlê pơla kơxô̆ bă tíu ‘măn rak mâu tơdroăng kal. Tơdroăng ki rơtế prôk ƀă tơdroăng ki veăng pêi pro dêi khu xiâm pơkuâ tơdroăng kal kí, dêi rêm râ Đảng, khu kăn pơkuâ, dêi khu mơdró kâ tung tung mơjiâng bro kế tơmeăm”.

Troh nôkố kong pơlê Kon Tum hiăng ai 48/86 cheăm pêi klêi thôn pơlê nếo, tung mê ai 7 to cheăm thôn pơlê néo mơdêk ƀă 2 to cheăm thôn pơlê tiô túa pơkâ. Rơtế ƀă mê kong pơlê xuân hiăng ai 21 to thôn pêi châ pơkâ kơpong kuăn pơlê rêh ối thôn pơlê nếo. Kố cho môi tung mâu tơdroăng ki kal vâ kong pơlê pêi pro mâu troăng hơlâ nếo, rơkê ƀă tơtro vâ mơdêk hơ’lêh kơxô̆ tung pêi chiâk deăng ƀă mơnhông thôn pơlê rơkê.