Tiô séa ngăn dêi kơvâ khăm pơlât, kiâ ngu ngĕng chiâng rêh tá tung mâu tơmeăm ôh tá ƀĕng ê môi tiah kơƀin tâ têa dêi kế pê pro rơngiâp, pro pơreăng tơngê lo mơheăm xông tâ tú tung dế rơnó tô. Tung 5 khế apoăng hơnăm 2024, lâp kong pơlê Dak Nông châ hlo 463 ngế tro tâ pơreăng tơngê lo mơheăm Dengue, tâk châ lối tơdê tâng pơchông ƀă roh kố hơnăm 2023. Pơreăng tơkŭm hên má môi a mâu tơring peăng hdroh cho Dak Song, Dak Rlâp ƀă pơlê kong kơdrâm Gia Nghĩa.

 Ki rơhêng vâ tối cho a Gia Nghĩa, tiô séa ngăn dêi kơvâ khăm pơlât, nôkố kơxô̆ ngế tro tâ pơreăng hiăng tâk 330 ngế/100.000 ngế kuăn pơlê, châ 2,2 xôh kơlo pơkâ mơdât. Pôa Êban Thanh Sơn, Kăn phŏ pơkuâ Tíu xiâm mơdât pơreăng kong pơlê Dak Nông, tối tô tuăn pơreăng tơngê lo mơheăm xông tâ tú rơdêi tung mâu khế rơnó mêi la ngiâ. Kơvâ ngăn pơkeăng ƀă khăm pơlât dế séa ngăn rêm hâi vâ mơnhên tơdroăng pơreăng xông tâ tú, hbrâ mơngế pêi cheăng, rơxế, tơmeăm pơlât pơkeăng xôh kơdê mâu tíu ai pơreăng.