Khu kăn xiâm pơkuâ hnê ngăn Đảng hiăng mơnhên vâ ăm pôa Đinh Tiến Dũng, Ngế cheăng tung Khu xiâm kal kí, Kăn pơkuâ ngăn khu kăn Kuô̆k hô̆i hneăng 15 pơlê kong kân Hà Nội lo pơtê tơdroăng pro pơkuâ, hnối lo pơtê cheăng hlông hlối. Tiô tối tơbleăng dêi Vi ƀan séa ngăn cheăng Đảng tơnêi têa ăm ‘nâi, tung pơla pêi tung khu Kăn pơkuâ hnê ngăn Đảng, Ngế xiâm râng liăn ngân hneăng hơnăm 2016-2021, pôa hiăng ai xôi ‘na tơdroăng Pơkâ mâu tơdroăng ki đảng viên ôh tá khoh pro, ôh tá rak tro tiô Tơdroăng pơkâ ‘na hnoăng cheăng ki djâ troăng; ôh tá rak vế tro tiô tơdroăng ki pêi cheăng; ôh tá pôu râng hnoăng cheăng tung pơkuâ ngăn, hnê tơdjâ mê khoh chiâng ai Khu kăn pơkuâ hnê ngăn Đảng, Khu xiâm râng liăn ngân ƀă mâu khu râ, kơvâ cheăng ki ai tơdjâk, mơngế krê, pro hên tơdroăng xôi, pêi cheăng ôh tá tro, ing mê, pro hía hên liăn ngân, pro ‘mêi ăm ngiâ méa, hnoăng dêi khu kăn pơkuâ, pro kơdroh tuăn loi dêi kuăn pơlê ƀă khu pơkuâ hnê ngăn cheăng Đảng, kơ koan pơkuâ ngăn tơdroăng cheăng tơnêi têa.

‘Nâi klê nhên hnoăng cheăng a ngiâ Đảng ƀă Kuăn pơlê, mê pôa hiăng chêh pro hlá đơn pâ pơtê cheăng ki râ pơpêng hiăng pơcháu, hnối pâ lo pơtê cheăng hlông hlối. Séa ngăn tơdroăng pơkâ ki pêi pro nôkố dêi Đảng, Tơnêi têa ƀă seá mơnhên ngăn ki pói rơhêng vâ dêi pôa Đinh Tiến Dũng, Khu kăn pơkuâ hnê ngăn Đảng hiăng ăm phep pôa Đinh Tiến Dũng lo pơtê cheăng, ki nhên, pơtê cheăng tung Khu xiâm kal kí, tung Khu xiâm pơkuâ hnê ngăn Đảng tơnêi têa hneăng XIII.

 Khu xiâm pơkuâ hnê ngăn Đảng hiăng ăm mâu kăn veăng tơpui tối ‘na rah xo mơngế kăn ƀô̆ ki rơkê vâ Khu xiâm ngăn cheăng kal kí pơkâ, tối ăm Kuô̆k hô̆i hneăng XV pôk vâ pro Ngế tung Vi ƀan xiâm hnê ngăn Kuô̆k hôi hneăng XV, hneăng hơnăm 2021-2026.