Bu klêi kơ’nâi tá hâi châ môi chât hơnăm, ƀăng tơnêi pêt sầu riêng tung lâp tơnêi têa hiăng tâk 6 xôh, châ vâ chê 180 rơpâu ha a hơnăm 2024, plâi gá châ 1,5 rơtuh tâ̆n, kơxô̆ liăn châ xo ing têa plâi ngi kong têa ê lối 3 rơtal dollars; gum kal khât tung tơdroăng pơkâ mơnhông kơpong pêi chiâk, pêt kong, păn ká xi xŏng xuân môi tiah tơdroăng pơkâ tê plâi ngi kong têa ê dêi kơvâ.

Laga, thăm mơnhông “tôu” hiăng mơhno hên tơdroăng ôh tá mơhúa drêng 4 khế apoăng hơnăm 2025, tê plâi sầu riêng ngi kong têa ê kơdroh hên ‘na túa pơkâ ƀă ki kơnía. Pôa Đỗ Đức Duy, ngế xiâm pơkuâ tối tơbleăng tâng ôh ti ai troăng hơlâ pơkuâ ngăn kơtăng, Việt Nam mơni kô trâm tơdroăng ôh tá tơniăn: rơlối plâi, yă chu rơpâ, ôh ti ai kong têa vâ tê, tơdjâk ó troh tơdroăng loi tơngah tung kế tơmeăm pêi lo ing chiâk deăng dêi Việt Nam.