Tung khế kŏng nhân 2024, kong pơlê Gia Lai kô tơkŭm po tơdroăng ‘’Mơnê mơngế pêi cheăng’’ vâ pâ mơnê, pơ-ô pơ-eăng đoân viên, mơngế pêi cheăng ai veăng kum hên ăm kơ koan, tíu cheăng, khu tê mơdró. Tơdrêng amê, pêi pro mơjiâng 10 toăng hngêi ‘’Hngêi kŏng đoân’’ diâp ăm đoân viên, mơngế pêi cheăng ai tơdroăng rêh ối pá puât; lăm pôu ƀă diâp kơxuô tơmeăm kŏng nhân tro trâm xía vâ xua pêi cheăng, mâu ngế tamo châi kơtiê...

Rơtế ƀă mê, mâu Liên đoân pêi cheăng tung mâu tíu cheăng kô tơkŭm po trâm mâ, tơpui tơno bă kŏng nhân; pêi pro tơdroăng ‘’Mo dâi vâ pêi cheăng, pêt mơjiâng tơmeăm’’ ƀă hên tơdroăng mơhno khôi túa lĕm tro, hơdruê xuăng, pơtâp ivá, tơ’noăng ivá. ‘Na pơkâ pêi inhên dêi tíu cheăng, pôa Võ Công Hoà – Kăn hnê ngăn Liên đoân pêi cheăng tơring Chư Sê, tối ăm ‘nâi: Tơring hiăng pêi pro 2 kơxô̆ liăn cho ‘’Tŏng kum mơhnhôk’’ ƀă ‘’Hngêi kŏng đoân’’ vâ tŏng kum ăm đoân viên ai tơdroăng rêh ối pá puât vâ đoân viên hmiân tuăn ƀă đi đo ai môi khu tơrŭm cheăng rơtế ƀă dêi tơná tung rêm tơdroăng rêh ối.

Tung khế 5 kố kô pêi pro mâu tơdroăng tơ’noăng pêi cheăng pêt mơjiâng tơmeăm, mơjiâng tơdroăng rŭm môi tuăn pơla mâu kŏng nhân, mơngế pêi cheăng’’.