A Hneăng hôp, mâu kăn teăng mâ hiăng tơpui tơno ƀă rơtế séa ngăn mâu tơdroăng, hnoăng cheăng kơjo pêi pro pơkâ, mơnhên tơdroăng pá puât, pơloăng mơnúa, tơvâ tơvân vâ mơnhên troăng pêi la ngiâ, troăng tah lôi pá puât, pêi pro châ tơƀrê pơkâ pêi kơpong Đông Nam Bộ ƀă pơkâ djâ cheăng kâ – rêh ối pơlê pơla kơpong Đông Nam Bộ pơtối mơnhông rĕng, tâi tâng, păng ‘nâng ƀă krá tơniăn.

Klêi kơ’nâi tơmâng mâu rơkong xông tơpui, mơgêi Hneăng hôp, pôa Phạm Minh Chính, Ngế pro xiâm hnê ngăn tơnêi têa tối rơdêi, tơdroăng kêi đeăng kĭ pơkâ kơpong Đông Nam Bộ tung pơla kố cho kal khât vâ: Pêi pro troăng tơmiât pêi la ngiâ, troăng tơmiât pêi, pơkâ pêi a Pơkâ mơnhông kơpong ƀă pơkâ râ tơnêi têa a kơpong; Pêi pro nhên tíu po mơnhông mâu kơvâ tơnêi têa tung kong pơlê; Pêi pro mâu tơdroăng tơkêa bro djâ ki tơdjêp ki kal pơla mâu kong pơlê tung kơpong, tơdjêp kơpong ƀă tơdjêp kơvâ; Mơdêk pêi pro mâu tơdroăng mơnhông tâi tâng ki tơ’lêi pơchông ƀă tíu cheăng kâ dêi kơpong, mơdêk mơnhông cheăng kâ – rêh ối pơlê pơla dêi tá kơpong ƀă mâu kơpong ki achê.