Troh kơmăng, môi khu pleăng hnoăng tơná pêi cheăng a Gia Lai tơvâ hên tơdroăng cheăng ‘mâi rơnêu pro troăng. Ngoh Lê Tuấn Thành, ngế pơkuâ khu pleăng hnoăng tơná tối, hdrối vâ ‘mâi rơnêu tíu ki hiăng tơ’nhiê ƀă mâu troăng ki tơ’nhiê hên, khu ngin hiăng lăm ngăn hdrối klêi mê pâ phêp mâu kăn, mơhnhôk tăng liăn vâ ‘mâi rơnêu pro. Tơdroăng rơnêu tơbêng pro troăng a tíu ki hiăng tơ’nhiê pro a kơmăng vâ ví ki tơvâ tơvân  mơdât a troăng prôk.

“Pêi môi tơdroăng ki lâi ‘lo ai pơxúa kơ nhŏng o pơlê pơla vâ pro rơdâ mâu tơdroăng ki ai pơxúa troh  ƀă rêm ngế, malối ƀă mâu hơnăm ối nếo vâi hdrêng. Pêi pro ƀă tơbleăng pro “Troăng prôk tơniăn lĕm’’ ƀă ‘mâi rơnêu ok tơbêng tơnêi a mâu tíu hiăng tơ’nhiê kơlung kơlăng vâ kum kuăn pơlê ai troăng prôk lăm lĕm tâ’’.

Drêng khu pleăng hnoăng tơná pơxiâm pêi cheăng, kuăn pơlê hiăng hâk vâ veăng kum pêi ƀă tơdroăng toi kơxái on tơhrik ăm bâ, hrik têa veăng hơ’lâk prêi xơmong, ƀă veăng kum ăm têa ôu, kế kâ ăm mâu droh rơtăm ki rơnêu pro tung pơla vâi pơtê iâ. Pôa Nguyễn Văn  Thuyết, kăn tôh kơphô̆ 10, bêng Ia Kring tối:

“Kuăn pơlê a kơpong kố ai hên tíu ki tơ’nhiê kơhlong kơhlâ, pá ‘nâng tung prôk lăm, hâi kố mâu rơtăm pleăng hnoăng tơná troh veăng kum ‘mâi rơnêu pro tíu ki tơ’nhiê, po tơbêng tơnêi a mâu tíu kơhlong, kuăn pơlê hâk mơnê. Púi vâ mâu rơtăm pơtối veăng kum pro nếo ăm kuăn pơlê ai troăng prôk tơniăn hlâu tâ’’.

Ôh tá xê to ‘mâi rơnêu pro troăng a Plei Ku, khu pleăng hnoăng tơná ối pro hên a mâu troăng prôk mâu tơring dêi kong pơlê Gia Lai. Sôk ro xua troăng prôk hiăng ‘mâi rơnêu pro tơdrăng lĕm ngoh Trần Trọng Trung, kuăn pơlê a cheăm Ia Yok, tơring Ia Grai ăm ‘nâi:

“Troăng prôk hiăng tơ’nhiê hên, pá ‘nâng prôk lăm, xuân ai rôh ai ngế ki ‘nâ hiăng kơtong klêh a klâng. Khu lăm pleăng hnoăng tơná troh lăm ‘mâi rơnêu pro troăng kuăn pơlê hlo tâ ro kơ tuăn hlối veăng pro ƀă mâu vâi ngoh o’’.

Tơdroăng “Troăng prôk tơniăn lĕm” châ tơbleăng pro ing khế 9/2023, troh nôkố hiăng pro 19 hdrôh ‘mâi rơnêu tíu ki hiăng tơ’nhiê mâu troăng a mâu thôn pơlê tâi tâng ki xŏn gá 30km a mâu tơring Ia Grai, Đăk Đoa ƀă pơlê kong kơdrâm Plei Ku, kong pơlê Gia Lai. Tơdroăng kố hiăng tơ’mot hrĭng ngế plĕng hnoăng tơná veăng pêi. Jâ Lê Kiều Thị Minh Thư, ối a cheăm Tân Sơn, pơlê kong kơdrâm Plei Ku, ngế veăng pêi cheăng tung khu pleăng hnoăng tơná, tối:

“Á ƀă dêi kuăn kơnốu a veăng pro “Troăng prôk tơniăn lĕm’’ veăng pro vâ troăng prôk lĕm vâ rêm ngế tơ’lêi hlâu drêng prôk lăm, kum po rơdâ vâ rế ai hên ngế veăng pêi tơdroăng ki lĕm ƀă kuăn pơlê, ƀă tuăn vâ pleăng hnoăng tơná pro pơxúa nhŏng o pơlê pơl”.

Mehé ai drêng tơdroăng cheăng rơnêu pro troăng a tíu hiăng tơ’nhiê hiăng pê klêi hnoăng cheăng mê a kơxo má, mâu ngế ki pleăng hnoăng tơná xuân tâ hơniâp ro tung hiâm mơno. Tơdroăng “troăng prôk tơniăn lĕm’’ ôh tá xê to veăng pro ăm lĕm mâu troăng prôk tung thôn pơlê, tơniăn ăm rơxế kơtâu, mê ối vâ mơhnê mơhno ăm rêm ngế rêh ối thế pêi pro tơdroăng ki lĕm, veăng ‘no hnoăng tơná pêi môi tơdroăng cheăng ki pơxúa ăm nhŏng o pơlê pơla, thăm tơrŭm dêi rơpó.