Tơbleăng a rôh leh, pôa Võ Tấn Đức – Kăn hnê ngăn pơtân Vi ƀan kuăn pơlê kong pơlê Đồng Nai ăm ‘nâi: Pêi pro tiô tơdroăng mơjiâng thôn pơlê nếo, tơring Xuân Lộc cho tơring ki djâ troăng ahdrối tung mơjiâng thôn pơlê nếo “4 ai’’, thôn pơlê nếo, thôn pơlê nếo mơdêk tơƀrê ƀă thôn pơlê nếo tiô túa.

Tiô pôa Đức, hnoăng pêi châ tơƀrê dêi tơring Xuân Lộc tung mơjiâng thôn pơlê nếo ai pơxúa tơdjâk kân troh tơdroăng mơnhông cheăng kâ - rêh ối dêi tơring Xuân Lộc tối krê ƀă tung kong pơlê tối tơdjuôm. Malối hiăng chiâng tíu ki nếo mơnhông tơƀrê dêi tơdroăng mơjiâng thôn pơlê nếo.

‘Na peăng tơring, jâ Nguyễn Thị Cát Tiên - Kăn hnê ngăn Vi ƀan kuăn pơlê tơring Xuân Lộc tối, ki tơƀrê tung mơjiâng thôn pơlê nếo cho ing mâu kuăn pơlê, 80% cho ‘na liăn ƀă kuăn mơngế ki pêi cheăng mơjiâng thôn pơlê nếo mơnhông tơbrê cho peăng kuăn pơlê.