Rôh kâ hmê a kơhâi dế, tíu tê hmê Lê Na, a ƀuôn Akŏ Dhông, pơlê kong kơdrâm Ƀuôn Ma Thuột, kong pơlê Dak Lak ai hên tơmối lăm troh kâ. Bu ing 40 rơpâu liăn, tơmối chiâng vâ rah xo 3 - 4 túa kơchâi kâ, mê cho kế ki kho, kế ki kơ-ốu, kế ki poh, kế ki pêi ƀă kơchâi têa. Tâi tâng mâu kế kâ kố pơrá châ pế pơchên tiô khôi hmâ dêi mơngế Rơđế, kâ ngăn kơhiâm, la ai môi tơdroăng mâu kế kâ kố pơrá hăng ƀă xăng.

Krếo vâi ăm hmê ƀă kơchâi trŏng xăng, châi pôm loăng kơ-ốu, hơ’nêh chu poh hơ’lâk ƀă po hăng, ngoh Lê Vạn Tiếp, a bêng Ea Tam, pơlê kong kơdrâm Ƀuôn Ma Thuột tối, ngoh hmâ troh kâ hmê kơhâi dế akố.

“Hdrối nah, á bu châ kâ mâu kế kâ ki kố drêng lăm troh a mâu pơlê cheăm, ki tung pơlê mê ai po mâu tơdroăng. Drêng ‘nâ hêng kâ mê á pế pơchên xêh la ôh tá kơhiâm lĕm môi tiah dêi mâu ngế akố pé pơchên ôh. Mê nôkố á hlo a Ƀuôn Ma Thuột ai mâu tíu ki tê hmê ăm ƀơrô cheăng chêh ‘mot mâu kế kâ mê tung inâi mâu kế kâ vâ tê ăm tơmối hlo gá lĕm kơhiâm, mâu kế kâ kơhiâm, ai hên kế kâ ki pin vâ rah xo tâ”.

Tiô nâ H’Rul Niê, ngế ki pơkuâ tíu tê hmê Lê Na, kơnôm ing mâu kơchâi kế ki ai xêh hên hĭn tung pơlê cheăm, tíu tê kố rế hía rế tơ’mot hên tơmối. Klêi kơ’nâi iâ khế, tíu tê hmê kố hiăng ai 3 tíu tê pơra phá dêi rơpó tung ƀuôn Akŏ Dhông, tê ing 10 chôu – 22 chôu rêm hâi.

“Hêng vâ kâ túa kơchâi ki lâi mê pó chêh tung mơ-éa mê ah pế pơchên tiô tơdroăng ki pơkâ thế dêi tơmối, malối cho kơchâi hlá pôm loăng, kơchâi tơpoăng, kơchâi trŏng xăng, ká khăng, plâi rơhung pêi, kơchâi hlá, kơchâi rơngiâp ƀă hên ki ê. Á roê tâi tâng mâu túa kơchâi kố dêi mơngế Rơđế tiô rơnó”.

Ing tơdroăng ki bu to pế pơchên ăm mâu rôh ôu kâ lơ tiô tơdroăng pơkâ thế pế pơchên dêi mâu khu tơmối ki ôm hyô, ing apoăng hơnăm troh nôkố, hên rơpŏng tung ƀuôn Akŏ Dhông hiăng hơ’lêh tê hmê. Mâu kế kâ ki ai hlâu tung pơlê cheăm, nôkố hiăng chiâng mâu kế kâ kơhiâm krê râng chêng tơmối. Nâ H’Minh Ƀuôn Yă (khĕn cho nôu Jay), ngế ki pơkuâ tíu Mnga Tăng Bi, a ƀuôn Akŏ Dhông tối, mâu kế kâ kố gá ai tơdroăng ki ‘mâi rơnêu ăm tơtro ƀă hên tơmối ki vâi krếo thế pế pơchên.

“Tơmối troh xuân hên kơdrâm, nôkố pế pơchên xuân hên. Á pế tiô túa dêi hdroâng kuăn ngo Rơđế, la ai hơ’lêh iâ, ôh tá hăng lối râ, ôh tá xăng lối râ, krâ kơvâ xo ăm kơbố xuân chiâng kâ tâi. Kế kâ mê hên khât yoh mê á pro tơrŭm, hâi ki lâi xuân hơ’lêh kế kâ, hmâ ai kơchâ ki lâi mê á pế tiô kế kâ ki mê”.

Ôh ti xê to a pơlê kong kơdrâm Ƀuôn Ma Thuột, hmê ki tê ăm mâu ngế cheăng tung ƀơrô cheăng ƀă ki xiâm kế kâ dêi mơngế Rơđế xuân hiăng ai mâ a pơlê kong krâm Ƀuôn Hồ. Ngoh Lê Thanh Vinh, tơmối lo ing Pơlê kong kân Hồ Chí Minh tối tiah kố, kế kâ xuân cho túa vâ kuăn pơlê kong pơlê kố mơđah tơbleăng túa lĕm tro dêi tơná.

“Á tơmiât tiah kố, ƀă tơdroăng ki ngăn mơnâ mâ dêi mâu kế kâ dêi hdroâng Rơđế mê xuân cho môi khôi túa ki vâ tơ’mot tơmối ôm hyô a hên tíu troh a kong pơlê Dak Lak. Xua ôm hyô mê pakĭng tơnêi tơníu mê kế kâ xuân cho môi tơdroăng ki xiâm pơkâ môi tơdroăng ki lâi ‘lo tung tơdroăng ki rah xo dêi mâu tơmối ki lăm ôm hyô”.

Ôh ti kal tơkôm troh rôh po mơdĭng lơ lăm troh a mâu pơlê cheăm hngế hngo, mê nôkố tơmối troh a Dak Lak châ tơ’lêi hlâu kâ mâu kế kâ khôi hmâ dêi mơngế Rơđế a pơlê kong kơdrâm Ƀuôn Ma Thuột. Mâu hmê kâ ki tê mâu mâu ngế cheăng tung ƀơrô cheăng hiăng ai hên túa kế kâ ing pơlê cheăm mot tung tơdroăng rêh ối tiô chal nôkố, chiâng mâu kế kâ vâ tê ăm hên hĭn ăm kuăn pơlê ƀă tơmối ƀă yă tê ôh tá kơnâ.