Ai 60 ngế hok tro châ kâ pri tung hneăng tơ’noăng hok tro rơkê hriâm râ má pái phôh thong râ tơnêi têa hơnăm 2023-2024 hâk tơngăm châ xo ƀâng kơdeăn khĕn dêi Khu xiâm ngăn hnê hriâm ƀă hnê mơjiâng tuăn ngôa rơkê.

Ai 31 thái cô ai hnoăng tung tơdroăng hnê hriâm tơ’nôm hnê rơbot ƀai ăm mâu hok tro hriâm rơkê ƀă 26 ngế vâi o hok tro châ kâ Huy chương mêa a hneăng tơ’noăng Olympic hâi lơ 30/4 kố nah hiăng xo Ƀâng kơdeăn khĕn xua Vi ƀan kuăn pơlê dêi kong pơlê diâp ăm.

Pakĭng mê, Vi ƀan hnê ngăn kuăn pơlê dêi kong Dak Lak ối diâp ƀâng kơdeăn khĕn ăm thái cô, hok tro ki ai hên hnoăng a hneăng tơ’noăng Trạng nguyên Tiếng Việt ki ăm to hok tro râ má môi, Hneăng tơ’noăng “Hok tro, sinh viên ƀă tơdroăng hriăn pêi pro pơxiâm pêi cheăng” ƀă Hneăng tơ’noăng “Hriăn plĕng khoa hok kih thuât ‘măn ăm hok tro râ má pái râ  tơnêi têa”.