Mâu hâi mơ’nui hơnăm, kuăn pơlê hdroâng Bơhnéa a pơlê Mơ Hra, cheăm Kông Lơng Khơng, tơring Kƀang, kong pơlê Gia Lai sôk, hơniâp, ro, tó koh tơdah mâu tơmối lo ing Hà Nội. Mâu tơmối pơrá hơniâp ro châ kâ hmê tơxông ki prông tung klŏng phêa, í pôh ƀă ôu drôu xiâm ki xăng lem ‘mrit; sôk suâ tung idrâp chuât pu hung pu hung dêi chêng koăng. Nâ Lê Thị Phương, mơngế tơmối lo ing Hà Nội, tối ăm ‘nâi:

“Kố cho roh apoăng á troh a kong pơlê Gia Lai, xuân cho roh apoăng á châ ngăn vâi krâ-nhŏng o tôu chêng Tây Nguyên. Ƀă ki rơhêng vâ tối mâu vâi ‘nĕng veăng mơđah, ing mê, cho tơdroăng ki tâ hơniâp ro, môi tơdroăng ki tâ tơniăn ƀă hơniâp ro”.

Tơdrêng ƀă pơlê Mơ Hra, cheăm Kông Lơng Khơng, tơring Kƀang, kong pơlê Gia Lai hiăng mơjiâng mâu pơlê ôm hyô dêi mơngế Bơhnéa, tung mê ai: KDang, cheăm Kông Lơng Khơng, pơlê Stơr, cheăm Tơ Tung, pơlê Kon Bông, cheăm Đăk Rong ƀă pơlê Chiêng, pơlê kân Kƀang. Pôa Đinh Mưnh, ối a pơlê Mơ Hra, cheăm Kông Lơng Khơng tối ăm ‘nâi:

“Ngin hiăng hbrâ mơjiâng pro homestay cho hngêi trá vâ ăm tơmối ối pơtê, rơpŏng kô pế hmê môi tiah khôi hmâ dêi kuăn pơlê akố, cho pế ƀă phái chiâk, ká ki tăng tơnăng a têa kroăng, têa krông, pế drôu xiâm ăm tơmối i ôu, hơdruê xuăng, vâi hiăng ro. Drêng ai tơmối mot tung pơlê, vâi tơmối vâ koi tíu lâi xuân hôm. Á cho krâ pơlê, á pôu râng hnoăng cheăng rơtế ƀă nhŏng o, đi đo athế kơdo mơ-eăm”.

Nâ Trần Thị Bích Ngọc-ngế cheăng tung Vi ƀan hnê ngăn cheăm Kông Lơng Khơng, tơring Kƀang tối ăm ‘nâi, hnoăng cheăng kring vế, rak ngăn túa lĕm tro dêi hdroâng kuăn ngo cho ing tơnêi tíu troh a khôi túa, vêa vong châ rak vế ngăn, pro ăm i tơtro vâ gum ăm kuăn pơlê po roh tơ’mot tơmối mot ôm hyô krá tơniăn ton.

“Ing tơdroăng ki pro ôm hyô pơlê pơla mê mâu túa tơmeăm khoăng mê xuân  châ vâi krâ-nhŏng o vâ mơnhông ăm i tơtro ƀă túa tơlá, môi tiah ‘măn rak-tôu chêng koăng, tĕn hmôu jiâ, tĕn pong, chêa, kơreăng. Vâi krâ-nhŏng o kơdo mơ-eăm rế pơtối mơdêk ki kơnía dêi túa lĕm tro rế mơnhông ôm hyô vâ tơ’mot tơmối troh rế hên a tíu ki ôm hyô pơlê pơla kố. Ing mê, xuân veăng gum ăm toná vâi krâ-nhŏng o pêi lo liăn ngân tơniăn”.

Ôh ta xê to mâu pơlê ki ôm hyô, mê a mâu cheăm ki ai kơdrâm hdroâng kuăn ngo ki iâ mơngế, hnoăng cheăng chôu ‘măn, rak vế túa lĕm tro prôk troh a tơdroăng ôm hyô krá tơniăn xuân dế châ pêi pro hên. Pôa Trần Xuân Nam, Kăn hnê ngăn Vi ƀan cheăm Lơ Ku, tơring Kƀang tối ăm ‘nâi:

“Mâu pơlê hiăng hbrâ rơnáu dêi xêh, chôu ‘măn, rak vế tuá tơlá lĕm tro dêi hdroâng Bơhnéa. Pakĭng mê, ngin ối po rơdâ tơdroăng kố hnê tơdjâ ăm thế mâu kuăn ngo ối peăng Kơnhŏng, môi tiah mơngế Mông, mơngế Tày vâ pơtối châ rak vế dêi khôi túa vêa vong tơná. Ki málối a roh leh, Têt, cheăm tơkŭm po tơdroăng xah ôm hêi a rơnó hơngui, tơ’mot hên mâu kuăn pơlê dêi hdroâng Bơhnéa veăng tôu chêng koăng. Xua ti mê, mâu pơlê ki ối akố hiăng hlê plĕng nhên tung tơdroăng kring vế, ‘măn rak khôi túa, vêa vong dêi kuăn ngo”.

Sap ing hơnăm 2022, tơring Kƀang hiăng mơ’no vâ chê 4 rơtal liăn vâ pơkâ pêi pro Tơdroăng tơkêa bro ‘măn chôu ƀă pơtối mơdêk ki kơnía túa lĕm tro tiô khôi hmâ dêi mâu hdroâng kuăn ngo hnối pêi adrêng ƀă mơnhông ôm hyô hneăng hơnăm 2021-2025. Pôa Đinh Đình Chi, Kăn pơkuâ Ƀơrô Tuá lĕm tro pơtâng tơdroăng nếo ai tơring Kƀang tối ăm ‘nâi, tơring kố xuân dế pêi pro tơdrêng hên mâu tơdroăng cheăng vâ gum kuăn pơlê châ pơtối ‘măn chôu, rak vế túa lĕm tro, mơjiâng tơdroăng cheăng kâ rêh ối tơniăn ăm tơná:

“Ki má môi cho mơ’no liăn mơjiâng pro hngêi trăng, troăng klông, ki má péa nếo cho chôu ‘măn ki kơnía git dêi tơmeăm khoăng, túa lĕm tro dêi hdroâng kuăn ngo, tơrŭm cheăng dêi pó chiâng tour vâ tơ’mot tơmối mot ôm hyô. Drêng tơmối hiăng troh mê pơtâp tơhmâ ăm kuăn pơlê ‘nâi pơkâ dêi xêh hnoăng cheăng, ing mê, vâ khoh pêi lo liăn ngân ăm dêi tơná; apoăng tơdroăng ki xo tơmeăm khoăng kố vâ tơbleăng mơhno ăm tơmối ôm hyô ƀă xuân hiăng châ liăn ngân vâ rak ngăn dêi tơmeăm khoăng ƀă tŏng gum tăng cheăng pêi ăm kuăn pơlê i tơniăn”.