Ing hâi lơ 11 troh lơ 14/12 la ngiâ kô po Măng tĭng Túa lĕm tro – Ôm hyô rôh má 5 ƀă tơdroăng tŏn chêng koăng mâu hdroâng kuăn ngo kong pơlê Kon Tum rôh má II. Ƀă inâi “Lăm ngăn túa lĕm tro – Tăng ‘nâi kong kế ki chiâng xêh”, tơdroăng po túa lĕm tro kố tung mê ai hên tơdroăng cheăng tơkŭm po ki hơniâp ro.

Ki xiâm cho Leh mơdĭng troăng kơphô̆ ƀă lối 1 rơpâu ngế ngê̆ sih, ngê̆ nhân, hok tro veăng; tơkŭm po tŏn chêng koăng, kơxoăng ƀă inâi “Idrâp chêng koăng kong ngo krip kơdrŏm” ai lối 600 ngế ngê̆ nhân veăng. Drêng kố xuân po mâu tơdroăng ki pơkâ mơdêk, mơđah tơbleăng ôm hyô, lăm hyô ngăn mâu tour, troăng prôk troh tíu ôm hyô a kong pơlê; tơ’noăng pế pơchên kế kâ ôm hyô Kon Tum ƀă inâi “Ki rơkê plĕng kơpong ngo ngối”; tơbleăng Túa pơkâ tơdjuôm mơjiâng pro Kơpong ôm hyô Măng Deang troh hơnăm 2045; mơnhên tối klêi kơ’nâi tơrŭm mơnhông ôm hyô ƀă 3 to kong pơlê peăng hdroh dêi Lếo, mê cho: Attapeau, Sekong ƀă Salavan.