Mâu tơdroăng mơhno túa lĕm tro, hơdruê xuăng, mơdĭng kô châ tơkŭm po tung plâ rôh Têt a hên tíu tung kong pơlê Dak Lak, môi tiah: Hâi mơdĭng túa lĕm tro mâu hdroâng kuăn ngo tơring Ea Kar ƀă rôh tơ’noăng vo plong, plong kayak a tơring kố (ing hâi má 4 – 6 Têt); Rôh tơ’noăng vo plong tiah hmâ a tơring Krông Ana (hâi má 7 Têt); Mơdĭng túa lĕm tro chal krâ Việt Bắc a tơring Krông Năng (ing hâi 13 – 15 khế Môi); Rôh tơ’noăng tơrup khôi hmâ tơring Krông Pač po rơdâ ƀă hơdruê quan họ (ing hâi 15 – 17 khế Môi).

Malối, a kong măng pơ’lâng hơnăm ton, a Plông kân 10/3, pơlê kong kơdrâm Ƀuôn Ma Thuột po tơdroăng ngê̆ thuât “Hâk mơnê Đảng tơniăn lĕm, hâk mơnê Rơnó Hơngui Ất Tỵ hơnăm 2025” ƀă pĕng mlŏi reăng ki ‘nâng ‘nâi. Tơdrêng amê kơpong tíu xiâm mâu tơring Ea Hleo, Krông Ƀuk, Krông Ana ƀă Ea kar xuân po tơdroăng ngê̆ thuât ƀă tơkŭm po pĕng mlŏi reăng ăm kuăn pơlê ngăn hdrối vâ pơ’lâng hơnăm ton tơdah hơnăm nếo.