Mơnhông tơdroăng kong kế ki lĕm mơnâ mâ ngăn, pơtối ối tung kơpong pêt sâm Ngọc Linh Kon Tum, kuăn pơlê pơlê Tu Thoh rơtế mâu khu mơ’no liăn hiăng mơjiâng hngêi homestay, mơjiâng hên kơdrum reăng, loăng mơnâ mâ ngăn; mơjiâng mâu tôh tôu chêng koăng – kohnhon xuăng, khu pế kơchâi kâ vâ ăm tơmối ôm hyô troh lăm ngăn. Hơnăm kố nah, pơlê Tu Thoh tơdah 5.000 roh tơmối.

A leh tơbleăng Pơkâ dêi Vi ƀan kong pơlê Kon Tum mơnhên pơlê vêh xĕn ối nếo Tu Thoh, cheăm Tê Xăng cho Pơlê ôm hyô pơlê pơla, Vi ƀan kuăn pơlê tơring Tu Mơrông tơkŭm po tê pơkâ yă 1kilô pơkeăng kong Ngọc Linh, tŏng gum kuăn pơlê mơjiâng pro hngêi trá xŏn tơdah tơmối ôm hyô. Roh kố Khu pơkuâ ‘na Khôi túa lĕm, Tơ’noăng ivá ƀă Ôm hyô kong pơlê Kon Tum xuân diâp kuăn pơlê Tu Thoh môi khu chêng kơnía.

Tơdroăng pơlê Tu Thoh a kơpong pêt pơkeăng kong Ngọc Linh Kon Tum châ mơnhên cho pơlê ôm hyô pơlê pơla po roh tơ’lêi hlâu vâ mơnhông ôm hyô ƀă rak vế khôi túa lĕm dêi mơngế Rơteăng.