Trung tươ̆ng Nguyễn Anh Tuấn, Chính ủy Mô đô̆i gâk tơkăng kong tối ăm ‘nâi, tơdah Hơngui nếo hơnăm kố, Đảng ủy, Khu xiâm pơkuâ Mô đô̆i gâk tơkăng kong hiăng hnê mơhno mâu tíu cheăng mơjiâng pơkâ pêi, pêi lĕm tro tâ tơdroăng hbrâ, pơtroh rơpâu tôh pêi cheăng chu a pơlê tơrŭm ƀă khu râ kăn pơkuâ hnê ngăn cheăng Đảng, khu râ kăn pơkuâ mâu kong pơlê tơkŭm po ăm mô đô̆i ƀă kuăn pơlê tơdah Têt, sôk ro hơngui ƀă rak gâk kring tơniăn, gâk tơniăn a mâu pơlê tơkăng kong.

Pơla kố nah, a cheăm Pa Tần, tơring Sìn Hồ, kong pơlê Lai Châu, hiăng tơkŭm po tơdroăng ‘’Hơngui Gâk tơkăng kong hơtô hiâm mơno Kuăn pơlê tung pơlê’’, ƀă hên tơdroăng pêi ki ai pơxúa. Troh veăng ƀă xông tơpui a tơdroăng pêi pro, pôa Lương Cường, Kăn xiâm hnê ngăn tơnêi têa tối tơbâ vế ki lĕm ƀă mơnê xua kăn ƀô̆, lêng Mô đô̆i Gâk tơkăng kong hiăng ƀă dế tơrŭm krá tơniăn ƀă khu râ kăn pơkuâ hnê ngăn cheăng Đảng, khu râ kăn pơkuâ kong pơlê, mâu râ, mâu kơvâ tŏng gum tơmeăm Têt ăm kuăn pơlê a kơpong tơkăng kong.

Kăn xiâm hnê ngăn tơnêi têa tối, kố cho tơdroăng pêi mơhno hiâm mơno pôu râng hnoăng cheăng, tiô khôi vâi krâ nah tŏng gum dêi pó dêi hdroâng mơngế ƀă tơdroăng ki lĕm dêi Khu lêng kuăn pơlê Việt Nam ngế khên tơnôu, kum tơbêng lĕm um méa ‘’Mô đô̆i Pôa Hồ’’ rơxông nếo.

‘’Tơdroăng kố châ tơkŭm po ƀă hên tơdroăng pêi ki nhên, ai kơnâ, achê ƀă kuăn pơlê mâu hdroâng kuăn ngo; xua mê, hiăng mơhnhôk tơdroăng ki veăng, tơdjuôm ivá, veăng mơ’no ivá xêh dêi hên kơ koan, khu tơrŭm cheăng, ngế krê ing Tơnêi têa troh kong pơlê ƀă mâu khu tê mơdró. Ƀă mâu hdrê ro, kơxuô tơmeăm, phái, kơƀăn chưng, diâp hnoăng liăn hriâm rơkê ăm mâu muăn hok tro kơtiê tơkâ hluâ pá puât, ‘’Kum o troh hngêi trung’’ ƀă tŏng gum 400 toăng hngêi...mê Tơdroăng diâp, mê ôh tá xê to mâu kơxuô tơmeăm ‘na châ, mê ối mơhnhôk ‘na hiâm mơno kân kĭn, kơnâ, kô gum rêm rơpŏng kơtiê a kơpong tơkăng kong rơtế khu lêng – kuăn pơlê lâp tơnêi têa tơdah Têt tiô khôi vâi krâ nah hơtô, phiu ro ƀă hơniâp lĕm tâ’’.

Klăng roh kố, pôa Lương Cường, Kăn xiâm hnê ngăn tơnêi têa diâp 200 toăng hngêi hơtô tơkăng kong kơnâ 10 rơtal liăn ăm kuăn pơlê kơpong tơkăng kong kong pơlê Lai Châu ƀă diâp 11 kơxuô tơmeăm ăm mâu rơpŏng ai hnoăng tơnêi têa. Tiô tơbleăng dêi Khu tơkŭm po, tâi tâng ki kơnâ kơxuô tơmeăm ăm mâu rơpŏng ai hnoăng tơnêi têa. Tiô tơbleăng dêi Khu tơkŭm po, tâi tâng ki kơnâ kơxuô tơmeăm ki diâp ăm ki khu lêng kuăn pơlê lâp tơnêi têa pơtroh mâu kơpong tơkăng kong ing tơdroăng ‘’Hơngui gâk tơkăng kong hơtô hiâm mơno kuăn pơlê tung pơlê’’ hơnăm 2025 cho vâ chê 25 rơtal liăn.

Xuân tung pơla kố nah, a kơpong tơkăng kong mâu kong pơlê tung kơpong Tây Nguyên hiăng tơkŭm po tơdroăng ‘’Hơngui gâk tơkăng kong hơtô hiâm mơno kuăn pơlê tung pơlê’’. A cheăm gâk tơkăng kong Ia Lốp, tơring Ea Súp, kong pơlê Dak Lak, Tơdroăng ‘’Hơngui gâk tơkăng kong hơtô hiâm mơno kuăn pơlê tung pơlê’’ hiăng diâp 5 toăng hngêi diâp mâu rơpŏng ai tơdroăng rêh ối pá puât, diâp vâ chê 400 kơxuô tơmeăm diâp ăm mâu rơpŏng ai hnoăng tơnêi têa, rơpŏng kơtiê, mâu rơpŏng ki kơhnâ rơkê, tơkŭm khăm pơlât, xing xoăng pơkeăng tê kơtê ăm lối 300 ngế kuăn pơlê.

A cheăm tơkăng kong Ia Pnôn, tơring Đức Cơ, kong pơlê, Tơdroăng ‘’Hơngui gâk tơkăng kong hơtô hiâm mơno kuăn pơlê tung pơlê’’ hiăng diâp 100 kơxuô tơmeăm diâp ăm mâu rơpŏng ai hnoăng tơnêi têa; 20 kơxuô tơmeăm diâp mâu vâi o hok tro ai tơdroăng rêh ối pá puât; khăm pơlât, xing xoăng pơkeăng tê kơtê ăm lối 200 rơpŏng kuăn pơlê. A cheăm Thuận Hạnh, tơring Dak Song, kong pơlê Dak Nông, Tơdroăng hiăng diâp 250 kơxuô tơmeăm diâp ăm rơpŏng kơtiê, rơpŏng ai tơdroăng rêh ối pá puât ƀă rơpŏng ai hnoăng tơnêi têa, mâu vâi o hok tro ai tơdroăng rêh ối pá puât ƀă tâi tâng ki kơnâ 150 rơtuh liăn; diâp 3 toăng hngêi tơrŭm môi tuăn diâp mâu rơpŏng ai tơdroăng rêh ối pá puât.

Kô chiâng mơnhên Tơdroăng pêi pro ‘’Hơngui gâk tơkăng kong hơtô hiâm mơno kuăn pơlê tung pơlê’’ châ tơkŭm po tung lâp kơpong tơkăng kong, rơlố, chiâng môi tung mâu tơdroăng tŏng kum pơlê pơla châ tơƀrê má môi, kal khât dêi Khu lêng, veăng tŏng gum Têt ăm mơngế  kơtiê, djâ ăm tơdroăng phiu ro, tơdroăng tung Têt phiu ro ăm Kuăn pơlê kơpong tơkăng kong. Ing mê, pro tơ’nôm ivá tơrŭm môi tuăn tâi tâng hdroâng mơngế, mơnhên mâu ki kơnâ khôi túa lĕm tro dêi hdroâng mơngế pin cho tuăn pâ dêi pó; cho tơdroăng ki lĕm ‘’Mô đô̆i Pôa Hồ’’.