Rơnó mêi khía mơhot hơnăm nah, mâu roh khía mơhot kân pro  toăng hngêi dêi jâ Nguyễn Thị Dung (kơpong Sơn Hà, pơlê kân Na Dương, tơring Lộc Bình, kong pơlê Lạng Sơn) thăm rế tơdro ôh tá krá xếo. Mot a rơnó hngíu, khía hngíu pê ing pơlôu djâ têa ngêa mot tung toăng hngêi kŭn. Mơhé hiăng mơ-eăm kơdĭng hên hơnăm laga tơdroăng cheăng pá puât, xua mê tơdroăng pói vâ dêi tâi tâng mơngế tung rơpŏng jâ Dung ‘na môi toăng hngêi xi, khía ôh tá châ pê mot, krá kâk mơni ôh tá la lâi chiâng khât. Laga, klêi mê, Têt kố châ tơdah hơnăm nếo tung toăng hngêi kân rơdâ lối 40 met karê ai mơnât ‘răng, kuâ ‘răng, trá ‘răng pro jâ Dung phiu ro bê ôh tá hlâk koi to lâi măng:

“Kơnốu á tro chó chêng sap hơnăm 1991, mê châi tamo plâ hơnăm, mé mê xua mơheăm ôh tá kơtâu troh a ngoâ hiăng hlâ 2 hơnăm kố, ối môi ngế kuăn kơnốu tô tuăn pêi cheăng păn roăng 5 ngế tung rơpŏng hngêi xua mê tơdroăng rêh ối pá puât ‘nâng. Sap ing ai troăng hơlâ xut tah hngêi xi kơchoh, Đảng, Chin phuh, Khu xiâm Kŏng an, mâu khu cheăng, đoân theh, mâu khu ki ai hiâm mơno tŏng gum mơngế pá puât hiăng tơmâng tŏng gum rơpŏng mơjiâng châ toăng hngêi kân lĕm rơdâ, krúa lĕm, rơpŏng á sôk suâ ƀă phiu ro ‘nâng’’.

Ƀă hiâm mơno ‘’ôh tá lôi kơbố parŏng’’, tơring Lộc Bình, kong pơlê Lạng Sơn dế pêi pro rĕng tơdroăng mơjiâng 292 toăng hngêi krá kâk ăm mâu rơpŏng kơtiê, vâ chê kơtiê, rơpŏng ai hnoăng tơnêi têa. Rêm rơpŏng ai kơxô̆ liăn dâng 110 rơtuh liăn, tung mê, Khu xiâm kŏng an tŏng gum 70 rơtuh liăn.

Pôa Trịnh Tuấn Đông, Kăn hnê ngăn Vi ƀan tơring Lộc Bình, kong pơlê Lạng Sơn dế mơdêk tơdroăng mơjiâng 292 toăng hngêi krá kâk ăm mâu rơpŏng kơtiê, vâ chê kơtiê, rơpŏng ai hnoăng tơnêi têa. Rêm toăng hngêi ai kơxô̆ liăn dâng 110 rơtuh liăn, tung mê, Khu xâm Kŏng an tŏng gum 70 rơtuh liăn. Pôa Trịnh Tuấn Đông, Kăn hnê ngăn Vi ƀan tơring Lộc Bình, kong pơlê Lạng Sơn tối ăm ‘nâi mâu kong pơlê tung tơring dế tơ’noăng vâ hâi khế vâ pêi kêi đeăng pơkâ hiăng mơ’no.

“Tơdroăng pêi pro Tơdroăng tơkêa bro xut tah hngêi pơtân, hngêi xi kơchoh cho troăng hơlâ kân dêi Đảng ƀă Tơnêi têa ƀă ai kơnâ kal khât, gum ăm kuăn pơlê ki rơhêng vâ tối cho mâu rơpŏng kơtiê, vâ chê kơtiê, rơpŏng ai hnoăng tơnêi têa châ tơmâng tŏng gum dêi mâu râ. Pin rơtế tơdjuôm ivá vâ xut tah hngêi pơtân, hngêi xi kơchoh, djâ troh ăm kuăn pơlê mâu toăng hngêi trung roh hơnăm nếo phâi hơtô. Tung tơdroăng pêi pro ngin hiăng mơhnhôk tâi tâng mâu râ kuăn pơlê tung kong pơlê ƀă hiâm mơno kơbố ai ki klâi mê veăng tơlo ki mê, vâ pro ti lâi mơjiâng châ 292 toăng hngêi kum kuăn pơlê tơdat Têt Lo hơnăm nếo phiu ro ƀă hơtô’’

Riân troh hâi lơ 17/12/2024, Vi ƀan Măt trâ̆n Tơnêi têa Việt Nam kong pơlê Lạng Sơn hiăng tơdah lối 77 rơtal liăn, tung mê hiăng xing xoăng (pơtân ăm) kơxô̆ liăn ăm mâu tơring mơjiâng hngêi nếo ăm mâu rơpŏng pá puât ƀă tâi tâng kơxô̆ liăn vâ chê 51 rơtal liăn. Tâi tâng kơxô̆ rơpŏng châ tŏng gum hngêi ối cho lối 2.400 rơpŏng, tơdroăng pêi pro châ lối 80%. Pôa Hồ Tiến Thiệu, Kăn hnê ngăn Vi ƀan kong pơlê Lạng Sơn mơnhên kong pơlê mơ-eăm xut tâi tâng vâ chê 2.500 hngêi pơtân, hngêi xi kơchoh ăm rơpŏng kơtiê, rơpŏng vâ chê kơtiê, rơpŏng ai ngế ai hnoăng tơnêi têa pá puât...hdrối khế 4/2025:

“Ngin hiăng tơkŭm hên vâ mơ-eăm xut tah hngêi pơtân, hngêi xi kơchoh tung hơnăm 2024 – 2025, hiăng mơhnhôk mâu khu râ ing pơlê pơla ƀă tâi tâng kơxô̆ liăn dâng 160 rơtal liăn. Nôkố tơdroăng dế châ pêi pro tâi ivá, tro troăng, troăng tơmiât hnê mơhno dêi Ngế pro xiâm hnê ngăn tơnêi têa cho mơjiâng tơdroăng pêi tơdjuôm ăm lâp pơlê pơla, vâ rêm ngế rơtế tơdjuôm ivá ôh tá xê krê 1 khu ki lâi, tơdroăng hiăng ai ivá troh lâp lu kân, mơjiâng tơdroăng loi tơngah, mơ-eăm ăm kuăn pơlê. Kố cho tơdroăng pêi ki kơnâ rơkê, mơhno tơdroăng tơmâng dêi Đảng ƀă Tơnêi têa troh kuăn pơlê, ki rơhêng vâ tối cho mâu rơpŏng pá puât. Mâu rơpŏng ki tá hâi ai hngêi kân lĕm rơdâ mê troh Têt Ất Tỵ kố kô ai hngêi nếo, kố cho tơdroăng ki mơhnhôk ƀă cho tơdroăng phiu ro kân ƀă mâu rơpŏng tung kong pơlê’’.

Rơnó Hơngui nếo dế vêh, mâu toăng hngêi “Tơrŭm môi tuăn’’ châ mơjiâng ôh tá xê djâ ki kơnâ trâu hơngế, mơhno hiâm mơno tŏng gum dêi pó dêi pơlê pơla mê ối cho tơdroăng ki mơhnhôk, pro tơ’nôm ivá vâ kuăn pơlê a kong pơlê kong ngo tơkăng kong Lạng Sơn hmiân tuăn mơnhông pêt mơjiâng tơmeăm, tơniăn tơdroăng rêh ối, mơ-eăm hluăn  ing kơtiê.