Kơxo lơ 14/1, a Hà Nội, pôa Phạm Minh Chính, Ngế pro xiâm hnê ngăn tơnêi têa pơkuâ Hneăng hôp roh má 5 Hô̆i đong pơkuâ hnê mơhno kơpong Tơbăng kroăng Hồng. Tiô tơbleăng, hơnăm 2024, cheăng kâ – rêh ối pơlê pơla dêi kơpong tơbăng kroăng Hồng pơtối mơnhông ó rơdêi, đi đo prôk troăng ahdrối tung pêi pro mâu roh pêi cheăng ton xŏn ƀă pơhlêh nếo troăng pêi tơtêk; tơtêk cheăng kâ tơkâ hluâ kơlo tơdâng tơdjuôm lâp tơnêi têa ƀă tơkâ kơpong peăng mâ hâi Lo pá Hdroh tơnêi têa; pơtối djâ troăng ahdrối ‘na xo hnoăng liăn ngân tơnêi têa, tê ngi kong têa ê, mơhnhôk mơ’no liăn cheăng a kong têa ê.

Xông tơpui a hneăng hôp, pôa Phạm Minh Chính, Ngế pro xiâm hnê ngăn Chin phuh tối rơdêi, tung la ngiâ, kơpong Tơbăng kroăng Hồng thế tơtêk 2 kơxô̆ vâ rơtế lâp tơnêi têa mot chal nếo môi tiah mơnhên troăng prôk la ngiâ dêi pôa Tô Lâm, Kăn xiâm pơkuâ hnê ngăn Đảng. Xua mê, Hô̆i đong tơkŭm mơnhên mâu tơdroăng hiăng pêi châ tơƀrê, tá hâi châ tơƀrê, séa ngăn, mơnhên xiâm kối, ƀai hriâm ki rơkê xo vêh tung tơdroăng pơkuâ dêi mâu khu xiâm, kơvâ cheăng, kong pơlê; ing mê, mơnhông mâu tơdroăng hiăng chiâng pêi pro, tah lôi mâu tơdroăng ki tá hâi tro, pá puât, tơvâ tơvân, ti tăng troăng tah lôi.

Ngế pro xiâm hnê ngăn tơnêi têa pơkâ thế khŏm mơ-eăm hên, mơ-eăm thế kân, pêi pro kơtăng, ai tơdroăng ki xiâm, pêi cheăng ki lâi thế klêi tơdroăng cheăng ki mê.