Ki xiâm dêi tơdroăng lăm séa ngăn mê tơkŭm mơnhên mâu kế tơmeăm, khu kế tơmeăm ki rôe kâ, rôe xúa hên má môi tung roh Têt, tơkŭm mơnhên tơdroăng ki rak vế tro lơ ôh ‘na luât pơkâ tung mơjiâng pro, tê mơdró kế tơmeăm kâ, lăm séa mơnhên ngăn mâu tíu tê mơdró kế kâ, têa ôu, tung pơla séa mơnhên ngăn kal athế ‘nâi nhên to lâi túa kế tơmeăm, mơjiâng pro ai xôi tơdroăng klâi, tâng ai xôi kô tro luât pơxâu phak tiô tơdroăng hiăng pơkâ.  Tơdrêng amê, hnối ai tá tơdroăng hnê tối ‘na pơkal athế mơjiâng pro, rak vế, tê mơdró kế kâ, tơmeăm ôu krúa hơ’djâ lĕm.

Khu hnê mơhno dêi kơvâ cheăng Xiâm tơnêi têa hiăng mơjiâng 5 khu tơrŭm rêm kơvâ cheăng tơkŭm pêi a tơdroăng mơdêk séa ngăn, tăng ngăn dêi mâu kơvâ cheăng ing Tíu xiâm tơnêi têa troh râ cheăm plâ tung rôh Têt Lo hơnăm nếo Ất Tỵ ƀă rơnó leh mơdĭng Hơngui 2025. Pakĭng mê, pơkâ thế mâu kong pơlê, mơjiâng mâu khu lăm séa ngăn, tăng ngăn dêi mâu kơvâ cheăng rêm râ, ing râ kong pơlê troh râ cheăm. Mơhnhôk tơbleăng hên a mâu ƀâng hnê ăm kuăn pơlê ‘nâi mâu pơkâ dêi luât ‘na rak  tơniăn krúa kế kâ xuân môi tiah thế hlê tung rah rôe mâu tơmeăm kế kâ, ‘măn ti lâi vâ krúa lĕm, pế pơchên ƀă xúa kế kâ.

Tiô Ngế xiâm ngăn Chiâk deăng ƀă Mơnhông thôn pơlê, rôh Têt hơnăm nếo cho rôh hên kuăn pơlê kal vâ rôe kế kâ, malối cho hơ’nêh mâm to kơnâ, Ngế xiâm pơkuâ ngăn hiăng tơrŭm ƀă mâu kơ koan, khu râ pơkuâ cheăng mơjiâng 9 khu lăm séa ngăn, rak ngăn mâu tíu poh chiê xâ hơ’nêh hmâm ki rôe ing tíu ê, tung mê, tơmâng ngăn khât 3 khu tơdroăng ki xiâm ‘na pơreăng, rak tơniăn krúa kế kâ ƀă tăng xiâm pêi lo. Pôa Tống Xuân Chinh, Phŏ Ngế xiâm dêi Khu xiâm ngăn păn mơnăn mơnôa, Ngế xiâm ngăn ‘na chiâk deăng ƀă Mơnhông thôn pơlê ăm ‘nâi:

 “Ƀă tâi tâng mơnăn mơnuâ nôkố mê ngin tối tơniăn kô ai tŭm hơ’nêh mâm, kơtâ í tê ăm mơngế vâ rôe a mơ’nui hơnăm a rôh ai hên leh Têt, malối cho rôh Têt Lo hơnăm nếo. Ing mê, Ngế xiâm ngăn ‘na chiâk deăng ƀă Mơnhông thôn pơlê pơkâ thế mâu kong pơlê, pơlê kong kân hnê mơhno ăm mâu kơ koan cheăng ‘na kơvâ ki mê, mâu kăn rêm râ tơrŭm ƀă  tơbleăng hnê mâu pơkâ dêi luât ‘na pêi pro tơniăn krúa kế kâ, ‘nâi ki rơ-iô ing tơdroăng xúa mâu trếo ki mơdât ôh tá ăm xúa tung kế kâ, trếo pa kong inâi ki châ ăm phêp chiâng xúa tung pêi pro rôh apoăng, xo, rak ngăn, pro têng khăng, pro hngíu kế kâ ki pê lo ing chiâk deăng, tơmeăm loăng kong ƀă ká xi xŏng ƀă hên ki ê”.

Ki khât a Pơlê kong xiâm Hà Nội Khu hnê mơhno 389 Pơlê kong kân Hà Nội ăm ‘nâi, hiăng rĕng Pơkâ a tơdroăng pro tơniăn krúa kế kâ vâ tê tung rôh Tết Ất Tỵ ƀă Leh rơnó Hơngui hơnăm 2025. Vi ƀan kuăn pơlê dêi pơkê kong kân Hà Nội  mơjiâng 4 khu lăm séa ngăn dêi mâu kơvâ cheăng lăm séa ngăn ‘na tơdroăng mâu tíu mơjiâng pro hôm pêi pro rak tơniăn krúa kế kâ râ pơlê kong kân. Ki xiâm séa ngăn tơkŭm a mâu tíu mơjiâng pro, tê mơdró, tíu tê, rôe mâu tơmeăm kế kâ, ki vâ xúa hên tung rôh Têt  ƀă plâ tung rơnó hơngui. A râ tơring, pơlê kân, kô mơjiâng mâu khu lăm séa ngăn tơbleăng pêi pro tơniăn krúa kế kâ ki tê tung pơla leh, Têt a mâu cheăm, bêng, pơlê kân. Pôa Đoàn Thanh Phong, Ngế xiâm hnê ngăn ‘na rak tơniăn krúa kế kâ Pơlê kong kân Hà Nội ăm ‘nâi:  

“Ƀă tơdroăng cho pơtối rak tơniăn krúa kế kâ tung tơdroăng rêh ối nếo, malối rôh Têt ƀă rôh leh mơdĭng mê khu kăn dêi mâu kơvâ cheăng kô lăm séa ngăn tơdrêng a mâu tíu tê mơdró kế kâ ƀă tung pơla séa ngăn tâng hlo mâu tíu ki lâi pro xôi luât pơkâ krúa kế kâ ngin kô phâk ƀă pơkâ thế mâu tíu ki mê, khu mơdró ki mê khŏm pêi pro tro kơtăng tiô luât hiăng pơkâ. Tâng ƀă mâu tíu pêi pro tê mơdró kế kâ ki dế râk vế pêi pro tro mê ngin kô hnê thế pơtối rak vế pêi pro tro tơdroăng ki lĕm”.

 Rak ngăn krâu tơdroăng tê mơdró tơmeăm ki vâ tê tung rôh Têt ƀă tung plâ rơnó leh mơdĭng, Khu Rak ngăn kơchơ mơdró tung lâp tơnêi têa tơbleăng ing apoăng Pơkâ a rôh ki ai hên khu ngế hriăn tê mơdró liu, ôh tá tơdrăng tung tê mơdró ƀă tê tơmeăm ôh tá xê khât rôh Têt hơnăm nếo Ất Tỵ hơnăm 2025; mơdêk tơdroăng séa ngăn, tăng ngăn kơchơ mơdró ƀă pơxâu phâk kơtăng mâu ngế ki lâi lơ ‘măn rak tơmeăm tơkôm rôh ki vâ pro to kơnâ yă, pơkâ yă, tê tung điê̆n tưh, tê mơdró, chơ djâ, ‘măn kơtôa  tơmeăm ki mơdât tê, tơmeăm ôh tá ‘nâi xiâm ing lâi, tơmeăm ôh tá xê khât, tơmeăm ki pro xôi hnoăng xúa tuăn ngôa ki tơkê, tơmeăm ôh tá lĕm, tơmâng ngăn khât a mâu tơmeăm ki hên mơngế kal râ rôe tung rôh mơ’nui hơnăm ƀă Têt Lo hơnăm nếo.

Mơdêk hnoăng cheăng séa ngăn, tăng ngăn tơniăn krúa kế kâ tung mâu tơdroăng pêi pro, pế pơchên troh xúa kâ; khŏm tơplâ, mơdât ƀă pơxâu phâk kơtăng mâu ngế, khu tơrŭm, mâu tíu pêi pro, tê mơdró ki pro xôi luât ‘na pro tơniăn krúa kế kâ.

Pôa Nguyễn Quang Huy, Phŏ ngế xiâm ngăn tâi tâng tơdroăng, pơkâ ‘na liăn ngân, Khu xiâm rak ngăn Tê  mơdró, Ngế xiâm ngăn kơchơ mơdró ăm ‘nâi: Khu rak ngăn Tê mơdró kô tơrŭm krá ƀă mâu kơ koan khu râ pơku cheăng ƀă mâu kăn kong pơlê séa ngăn nhên mâu tơmeăm ing tíu tê mơdró kăng kong ki mot tê tung tơnêi têa:

“Ƀă mâu tơmeăm kế kâ kơpong tơkăng kong mâu Khu rak ngăn ‘na tê mơdró tơrŭm krá ƀă mâu khu râ kơvâ cheăng a tíu tê mơdró tơkăng kong tơkŭm séa ngăn nhên vâ mơdât mâu tơmeăm tê cho mâu hơnêh mâm ro, chu, í, pêap ki tê liu ing kơpong tơkăng kong tiô troăng chêng, kơno tuk, tơraih tơƀai, mâu tơmeăm ki cho vâ ‘mot tê tung tơnêi têa pin. A kơchơ mơdró tung tơnêi têa, Khu rak ngăn tê mơdró tơkŭm séa ngăn nhên mâu tơmeăm a mâu kơchơ xiâm, kơchơ kân, kơchơ hmâ tê, kơchơ kuăn pơlê tê rôe tơmeăm tơmâng ngăn pơkâ yăng, tê tro tiô yă hiăng pơkâ... Pơtối mơdêk tơdroăng tơplâ mơdât ƀă khu ngế tê mơdró liu, ôh tá tơdrăng tung tê mơdró ƀă tê tơmeăm ôh tá xê khât tung măng, malối cho măng pơlê pơla”.

Séa ngăn kơtăng răk ngăn tơniăn krúa kế kâ tung rôh Têt Lo hơnăm nếo Ất Tỵ 2025 ƀă rơnó leh mơdĭng 2025, hnoăng cheăng pêi dêi mâu kong pơlê kal khât. Malối, mâu tíu pêi pro tê mơdró kế kâ ki pêi lo ing chiâk deăng ki nhôm ôh tá tơniăn, ôh tá krúa, mơngế kal vâ rôe hên tung rôh leh, Têt. Mâu ngế ki pro xôi luât ôh tá tơniăn krúa kế kâ tâng châ ‘nâi kô pơxâu phâk kơtăng, ƀă hnê hlối tơbleăng tung hlá tơbeăng, um tơvi tro tiô luât pơkâ. Rêm ngế kuăn pơlê thế cho mơngế ki rơkê rah rôe mâu tơmeăm kế kâ vâ tơniăn ivá ăm tơná ƀă rơpŏng hngêi, rơtế ƀă tơnêi têa tơniăn xah hêi ro rơnó hơngui.