Chôa xut pơlâng mâu kơtó têa mâ dê kuăn koi a xoăng pơlât, ngăn ngiâ dêi kuăn hlo to tíu rong, kơpeăng kŏng tro rong hiăng vâ tâi ƀă thế tah hơ’răng kŏng kăn ƀă hơ’răng pơchốu, tung hiâm tuăn nâ Trần Thị Thu Hằng ối a cheăm Tam Giang, tơring Krông Năng, kong pơlê Dak Lak xuân môi tiah vâ lo mơheăm. Châ mâu ƀok thái pơkeăng ki Khoa Chấn thương Chỉnh hình Hngêi pơkeăng kân Kơpong Tây Nguyên pơlât, tíu tro rong hiăng chía tâ iâ, la tơdroăng trâm xía vâ xua mlŏi pơtôu tro dêi kuăn, xuân ối pro hiâm tuăn ngế nôu xâu rơ-iô.

“Drêng pơtôu kuăn pơlê pin tŏng gum djâ ngi hngêi pơkeăng, klêi mê krếo phôn ăm á, drêng mê á préa kơtong hlối. Ƀok thái pơkeăng tối kơpeăng kŏng o thế pôe tah 2 hơ’răng drêng tâng tối á môi tiah kơtê klêa hlối, á ôh tá ‘nâi pro ti lâi vâ pơ’lêh ăm dêi kuăn’’.

Nâ Nông Thị Tiên, nôu o Trần Nhật Phong, ối a cheăm Đăk Gla, tơring Dak Mil, kong pơlê Dak Nông xuân nếo tơkâ luâ tơdroăng kơdrâ xâu rơ-iô ó môi tiah mê há. Phong ƀă pú gá hriăn pro xêh mlŏi klêi mê djâ a hngêi Cú ‘măn dêi. Xua trếo pơkeăng tung mlŏi ki pro tro kơchoh, o  hiăng xo ‘măn tung hdro kheăng a kơnoh on klêi mê tiê ăm on koh vâ pro ăm mlŏi xĭng, mê chiâng ai tơdroăng rong râ xua mlŏi pơtôu têi.

“Á xuân ‘nâi ki rơ-iô dêi mlŏi, á xuân hiăng hnê tối hên ăm dêi kuăn la ôh tá vâ hmâng. Hâi ki gá tro rong, ngăn ngiâ  gá a kơdrâ, khéa, ôh ta tơmiêt gá râ ó tiah mê’’.

Tíu tro rong a kŏng ƀă a ngiâ ga kô prêi lĕm tiô hâi khế, la tơdroăng ki khéa ‘na tuăn ngôa pá vâ kâi piu. Ƀă vâi o, tơdroăng xía vâ xua mlŏi pơtôu ôh tá xê to tíu ki xêt xua puih, mê ối pro ăm ai tơdroăng ki khíu hơ’nêng ‘na tuăn ngôa, tơdjâk troh ki xông rơdêi ƀă tơdroăng ki ó tâ, tơmiât ‘na tơdroăng rêh ối rơtâ tá. O Hoàng tung mâu hâi pơlât a hngêi pơkeăng, hiăng hlê tơdroăng ki rơ-iô dêi mlŏi.

“Á ngăn tung Tiktok klêi mê á chêh xo rôe xêh mâu trếo, klêi mê a hơ’lâk ƀă mâu trếo. Á ok trếo ki mê rôh má 3 klêi mê kơdrâ pơtôu. Ƀok thái pơkeăng pik ƀă pâk pơkeăng châi ó ‘nâng, á hiăng préa ‘na mlŏi ôh tá hêng xah xếo”.

Kố cho tuăn tơmiêt dêi o Phong drêng dế trâm tơdroăng châi xua ing mlŏi pơtôu pro.

''Kố kŏng châi ‘lo ‘lok ƀă êi, hên pơtong lo têa, ngiâ xuân châi, Á hiăng préa xua  á xuân hâi ‘nâi tơmiât troh ki rơ-iô dêi trếo pơtôu’’.

Ƀok thái pơkeăng Nguyễn Minh Trực, Ngế pơkuâ Khoa Chấn thương Chỉnh hình Hngêi pơkeăng kân kơpong Tây Nguyên tối, mâu tơdroăng xía vâ dêi mlŏi pơtôu hmâ hlo a rôh pơtê hriâm ƀă rôh Têt, ƀă kơxô̆ vâi hdrêng tro rong hên.

Rêm hơnăm, kơvâ ki kố tơdah xo pơlât 20 ngế tro rong tung rôh xah mlŏi. La tíu tro rong ing mlŏi pơtôu ki ‘nâ râ ó, chiâng puih ó, chiâng tơđôu hơ’răng kŏng, ‘nâ hía chiâng plôm mâ. Mâu ngế ki puih ó ing trếo ki vâi pro xêh mê  thăm rơ-iô tâ, xua ki ‘nâ kô pro rong râ troh mâu kơ koan tung klêa kliâm, thế pâ pơlât ton hâi.  

“Mlŏi pơtôu pơtih môi tiah tíu rong ing hyôh pơtôu têi. Ai mâu ki ‘nâ thế pôe tah mâu hơ’răng kŏng drêng mê kơpeăng kŏng ôh tá lĕm môi tiah hdrối nah xếo, pro chiâng chó plâ rơxông ăm vâi o. ‘Na rơpŏng hngêi, pơlê pơla xuân thế tơmâng khât troh kuăn ‘nĕng, xua mâu tơdroăng rong râ môi tiah mê kô pro ăm chiâng ai tơdroăng châi ó troh xo ah hmôi’’.

Xía vâ xua mlŏi pơtôu ôh tá xê to tơdroăng hơ’muăn dêi môi rơpŏng hngêi lơ tơdroăng hơ’muăn krê a kong pơlê Dak Lak mê ối cho dêi tâi tâng pơlê pơla. Tơdroăng hơ’muăn ‘na mâu ngế ki oh tá mơhúa, mâu ngế ki chiu pôu tơdroăng khéa kho xua tro rong râ, châi heăng, cho tơdroăng vâ tối hdrối thế hlê plĕng nhên ƀă thế pơkâ luât pêi pro tơdroăng vâ ví; rêm ngế thế mơdêk xêh hnoăng krí vế tơná ƀă on veăng kuăn ‘nĕng pôi tá trâm tơdroăng ki ôh tá mơhúa.