Pôa Phạm Mạnh Hùng, Kăn xiâm phŏ pơkuâ Rơ’jíu Việt Nam, Kăn hnê ngăn Hô̆i đong Sơ khảo ăm ‘nâi, klêi kơ’nâi rah xo tung tâi tâng kơxô̆ lối 4 rơpâu ƀai chêh pơtroh tơ’noăng dêi 163 kơ koan chêh hlá tơbeăng, Hô̆i đong sơ khảo rah xo châ 725 ƀai. Klêi mê, Hô̆i đong sơ khảo hiăng tơpui tơno, môi tuăn tơbleăng 105 to ƀai mot tung rôh châ̆m chung khảo.

Mâu ƀai hiăng chêh tro ƀă tơdroăng rêh ối, cheăng kâ hên inâi, kơvâ ƀă tối tro mâu tơdroăng ki châ kơjo hnê mơhno nếo dêi Khu xiâm pơkuâ tơdroăng kal kí, Khu pơkuâ Tíu xiâm tơnêi têa hneăng 13, pôa Tô Lâm, Kăn xiâm pơkuâ hnê ngăn Đảng, malối cho mâu tơdroăng pơkâ mơ’no ăm tơnêi têa ƀă tá khu pơkuâ tơdroăng kal kí hbrâ rơnáu tíu cheăng, ivá ƀă khŏm mơ-eăm ăm tơnêi têa mot tung chal nếo.

Mâu ƀai tối ki rơkê plĕng mâu tơdroăng cheăng dêi Kuô̆k hô̆i ƀă Hô̆i đong hnê ngăn kuăn pơlê rêm râ, tơkŭm tung 3 tơdroăng ki kal dêi Kuô̆k hô̆i cho mơjiâng luât, séa ngăn arak luât ƀă pơkâ mâu tơdroăng ki kal dêi tơnêi têa.