Kơxê lơ 24/12, a Hngêi Kuô̆k hô̆i, Pôa Trần Thanh Mẫn, Kăn xiâm hnê ngăn Kuô̆k hô̆i djâ troăng roh hôp dêi Vi ƀan pơkuâ Kuô̆k hô̆i tơpui séa ngăn, pơkâ mâu tơdroăng ối tung kơvâ liăn ngân, mê cho: tơ’nôm ai pơkâ ing liăn ngân Tơnêi têa ăm mâu kong pơlê vâ pêi pro Tơdroăng tơkêa bro Thăm pơkuâ ƀă tơnêi tơníu ai xiâm kối ing mâu khu pơkuâ tơnêi tơníu ƀă loăng kong nôkố xua mâu kŏng ti pêi chiâk deăng, kŏng ti pơkuâ loăng pơlái ki ê, rơpŏng, ngế krê xúa; kơlo hnoăng mơhá rak vế kong prâi ƀă têa kơxăng, têa châu, rơmâ tung hơnăm 2025.

Pơtối mê, Vi ƀan pơkuâ Kuô̆k hô̆i môi tuăn tơbleăng pơkâ ăm phêp pro mơdon hâi khế pêi pro Pơkâ kơxô̆ 09 ƀă kơlo liăn ki hên pơtân cho 1,44% tối hdrối xo, mơ’no liăn ƀaoh hiêm pơlê pơla, ƀaoh hiêm ôh tá ai cheăng pêi ƀă hâi khế ton troh tâi lơ 30/6/2025. Vi ƀan pơkuâ xuân tơtrŏng, kố cho troăng pêi vâ tơniăn tơdroăng pơkuâ, ƀaoh hiêm pơlê pơla tung tơdroăng tá hâi teăm ai pơkâ nếo ƀă dế pêi pro rah bro lế lĕm tro, khu pêi cheăng ƀaoh hiêm pơlê pơla Việt Nam tiô Pơkâ 18.