Vi ƀan kong pơlê Dak Lak nếo tơbleăng Hlá mơ-éa kal kơxô̆ 12032 ‘na tơdroăng rah bro lế lĕm tro, khu pêi cheăng tơnêi têa mâu kơ koan ối tung Vi ƀan kong pơlê, Vi ƀan kuăn pơlê râ tơring vâ mơjiâng môi tơdroăng pơkuâ tơnêi têa xêt khât, châ tơƀrê, tơxâng pơkâ pơhlêh tro pơkuâ tơnêi têa tung hneăng nếo.

Pơtối mê, kong pơlê kô tơkŭm po pro chiâng môi ƀă tơmot mâu khu, kơvâ cheăng, tơdrêng amê ‘mâi rơnêu tơdroăng tơkŭm po khu vâ kơdroh tíu ki xiâm, mơdêk ki dâi lĕm tung pơkuâ. Ki nhên: Khu Pơkâ túa cheăng ƀă Mơ’no liăn cheăng ƀă Khu pơkuâ liăn ngân kô tơ’mot chiâng Khu pơkuâ Cheăng kâ – Liăn ngân.

Khu Pơkuâ loăng pơlái kong kế ƀă kong prâi ƀă Khu pơkuâ ‘na pêi chiâk deăng ƀă Mơnhông thôn pơlê kô tơ’mot chiâng Khu pơkuâ pêi chiâk deăng ƀă Kong prâi. Khu pơkuâ Mơjiâng tơmeăm ƀă Khu pơkuâ troăng prôk ƀă rơxế kơtâu kô chiâng Khu mơjiâng tơmeăm khoăng ƀă Troăng klông. Khu pơkuâ Kăn ƀô̆ ƀă Khu pơkuâ Cheăng pêi Mô đô̆i rong râ ƀă Rêh ối pơlê pơla kô chiâng Khu pơkuâ Kăn ƀô̆ ƀă Pêi cheăng.

Khu pơkuâ Khoa hok Kŏng ngê̆ ƀă Khu pơkuâ tơdroăng nếo ƀă Hlá tơbeăng kô chiâng Khu pơkuâ Khoa hok Kŏng ngê̆ ƀă Hlá tơbeăng. Kong pơlê xuân tơkŭm tơ’mot chiâng môi Rơ’jíu ƀă Um tơvi ƀă Hlá tơbeăng Dak Lak chiâng Tíu xiâm pơtâng tối tơdroăng kal kong pơlê Dak Lak, gum vâ rah bro lế lĕm tâ mê nếo mâu ngế pêi cheăng pơkuâ hlá tơbeăng ƀă mơdêk ki châ tơƀrê tung tơdroăng pơtâng tối.

Klêi kơ’nâi mâu Khu châ tơ’mot chiâng môi ƀă pơtê, Dak Lak kô kơdroh ki vâ iâ 9 Khu, kum rah bro lế lĕm tro khu pêi cheăng tơnêi têa, kơdroh mâu tíu ki xiâm, ƀă mơdêk châ tơƀrê tơdroăng pơkuâ tơnêi têa.